پشاور(رپورٹنگ آن لائن ) وزیراعلی خیبرپختونخوا سہیل آفریدی نے کہا ہے کہ بانی پی ٹی آئی کا پیغام لے کر سندھ آرہا ہوں، اسٹریٹ موومنٹ کی تیاری میں سندھ کے عوام بھرپور ساتھ دیں،11جنوری کو مزار قائد پر کراچی کی تاریخ کا بڑا جلسہ ہوگا۔وزیراعلی کے پی تین روزے دورے پر سندھ کےلئے روانہ ہو گئے، جہاں وہ اسٹریٹ موومنٹ کے ساتھ ساتھ اہم ملاقاتیں اور مزار قائد پر جلسہ کریں گے۔روانگی سے قبل سندھ کے عوام کےلئے خصوصی پیغام میں وزیراعلی سہیل آفریدی نے کہا ہے کہ وہ اپنے بانی چیئرمین کا پیغام لے کر سندھ جا رہے ہیں ، ان کا یہ دورہ 3 روزہ ہوگا، جس کے دوران وہ مختلف تقریبات میں شرکت کریں گے۔
انہوں نے کہا کہ اسٹریٹ موومنٹ کی تیاری میں سب کو بھرپور ساتھ دینا ہوگا۔ 11 جنوری بروز اتوار شام 4 بجے مزار قائد پر جلسہ منعقد ہوگا، جس کی بھرپور تیاری کی جائے ۔ یہ کراچی کی تاریخ کا بڑا جلسہ ہوگا۔بعد ازاں سہیل آفریدی اسلام آباد ایئرپورٹ پہنچے ۔ اس موقع پر صوبائی کابینہ کے اراکین، خیبرپختونخوا سے اراکین قومی و صوبائی اسمبلی بھی وزیراعلی کے ہمراہ موجود تھے۔ اس موقع پر وزیراعلی کے معاونِ خصوصی شفیع جان نے بتایا کہ وزیر اعلی سہیل آفریدی کی کراچی میں وکلا، تاجر تنظیموں، وزیراعلی سندھ اور میڈیا سے ملاقاتیں شیڈول ہیں۔ شفیع جان نے بتایا کہ بانی چیئرمین عمران خان کی ہدایات پر سندھ کا یہ دورہ اسٹریٹ موومنٹ میں مزید تیزی لانے کے لیے اہم ہے۔
پیر کے روز وزیراعلی سندھ سے ملاقات بھی شیڈول ہے۔ اسی طرح 11 جنوری کو مزار قائد پر بڑا جلسہ منعقد کیا جائے گا۔ معاون خصوصی کے مطابق وزیراعلی سہیل آفریدی آج (ہفتہ کو )ریلی کی صورت میں حیدرآباد جائیں گے، جہاں حیدرآباد بار اور پریس کلب میں خطاب کریں گے۔ ہفتہ کے روز آئی ایس ایف کنونشن میں شرکت کے علاوہ سندھ کابینہ اور دیگر معززین سے ملاقاتیں بھی کی جائیں گی، جب کہ وزیراعلی حیدرآباد اور کوٹری میں اسٹریٹ موومنٹ کی قیادت کریں گے۔
شفیع جان کا کہنا تھا کہ وزیراعلی سہیل آفریدی اتوار کے روز آئی ایل ایف، سینئر وکلا اور آل سٹی تاجر اتحاد ایسوسی ایشن سے ملاقات کریں گے۔ اس کے علاوہ کیماڑی اور ضلع غربی میں اسٹریٹ موومنٹ کی سرگرمیوں میں حصہ لینے کے ساتھ مزار قائد پر حاضری دیں گے، جب کہ ایم ڈبلیو ایم قیادت اور ضلع مشرقی میں میڈیا سے بھی ملاقاتیں کریں گے۔انہوں نے کہا کہ وزیراعلی سہیل آفریدی پیر کے روز سندھ ہائی کورٹ بار ایسوسی ایشن سے خطاب کے بعد پشاور روانہ ہوں گے۔
