اسلام آباد (رپورٹنگ آن لائن)وزیراعظم عمران خان کی زیر صدارت وفاقی کابینہ کا اجلاس16 مارچ کو ہوگا اس حوالے سے 16 نکاتی ایجنڈا جاری کردیا ،اجلاس میں ملک کی موجودہ سیاسی و معاشی صورتحال کا جائزہ لیا جائے گا، وفاقی کابینہ سینیٹ انتخابات اور اپوزیشن کے دھرنے پر بھی مشاورت کرے گی۔
ذرائع کے مطابق وزیراعظم عمران خان کی زیر صدارت وفاقی کابینہ کا اجلاس 16 مارچ کو ہوگا، اجلاس کا 16 نکاتی ایجنڈا جاری کردیا ہے۔اجلاس میں ملک کی موجودہ سیاسی و معاشی صورتحال اور سینیٹ انتخابات، اپوزیشن کے دھرنے پر مشاورت کی جائے گی، ایجنڈے کے مطابق نیشنل بک فائونڈیشن کے ایم ڈی کی تقرری اورممنوعہ اسلحہ کے لائسنس کے اجرا کی منظوری دی جائے گی۔اجلاس میں چیئرمین کراچی پورٹ ٹرسٹ کے اضافی چارج کی منظوری اورسندھ انفراسٹرکچر ڈویلپمنٹ کمپنی کے سی ای او کے اضافی چارج کی منظوری کا بھی امکان ہے۔
وفاقی کابینہ کے اجلاس میں گیس کی ترقیاتی اسکیموں پر عملدرآمد کا جائزہ لیا جائیگا، کابینہ کمیٹی برائے ادارہ جاتی اصلاحات کے فیصلوں کی توثیق کی جائیگی، ای سی سی کے 10 مارچ کے فیصلے کی توثیق بھی کی جائے گی۔اجلاس میں سوشل ویلفئر فنڈ 2021 کے استعمال کیلئے رہنما اصولوں کی منظوری بھی متوقع ہے۔
