لاہور (رپورٹنگ آن لائن)وزیراعلیٰ سردار عثمان بزدار نے کہا ہے کہ وزیراعظم عمران خان نے اوورسیز پاکستانیوں کو ووٹ کا حق دے کر ان کے دل جیت لئے ہیں۔
وزیراعلیٰ پنجاب سردار عثمان بزدار سے بیرون ملک مقیم پاکستانیوں کے وفد کی ملاقات ہوئی جس میں وفد نے وزیر اعلیٰ عثمان بزدار کو اوورسیز پاکستانیوں کے مسائل اور سفارشات سے آگاہ کیا۔ملاقات میں وزیر اعلیٰ عثمان بزدار نے اوورسیز پاکستانیوں کی قابل عمل تجاویز پر عملدرآمد کی یقین دہانی کرائی۔عثمان بزدار نے کہا کہ اوورسیز پاکستانی ہمارے بھائی ہیں، ان کے مسائل ترجیحی بنیادوں پر حل کئے جائیں گے، تحریک انصاف کی حکومت نے اوورسیز پاکستانیوں کو ووٹ کا حق دے کر ان کے دل جیت لئے ہیں۔
وزیراعلیٰ پنجاب کا کہنا ہے کہ اوورسیز پاکستانی ہمارا اثاثہ ہیں، ماضی میں بیرون ملک مقیم پاکستانیوں کے مسائل سے پہلو تہی کی گئی اور سابق حکومتوں نے دعوے زیادہ اور کام کم کئے۔انہوں نے مزید کہا کہ اوورسیز پاکستانیوں کو ووٹ کے حق کی مخالفت کر کے اپوزیشن جماعتوں نے اپنا دوغلہ چہرہ خودبے نقاب کیا، ہر سفارتخانے میں اوورسیز پاکستانیوں کو ایک کلک سے پنجاب میں درکار ریکارڈ مل جائے گا۔
ملاقات میں اوورسیز پاکستانیوں کے مسائل کے حل میں ذاتی دلچسپی لینے پر وزیر اعلیٰ عثمان بزدار کو خراج تحسین پیش کیا گیا۔دوسری جانب اوورسیز پاکستانیز کے وفد نے کہا کہ بیرون ملک مقیم پاکستانیوں کو سہولتیں فراہم کرنے اور ان کے مسائل کے حل کے لئے حکومت پنجاب کے اقدامات قابل تحسین ہیں۔انہوں نے کہا کہ وزیر اعلیٰ عثمان بزدار نے اوورسیز پاکستانیوں کیلئے وزیر اعلیٰ آفس کے دروازے کھول دیئے ہیں، ہم انکی خدمات کو قدر کی نگاہ سے دیکھتے ہیں۔اوورسیز پاکستانیز کے وفد نے مزید کہا کہ وزیر اعلیٰ عثمان بزدار پنجاب میں انقلابی تبدیلیاں لا رہے ہیں۔واضح رہے کہ اوورسیزپاکستانی کمیشن پنجاب کے وائس چیئرمین مخدوم سید طارق محمود الحسن اور متعلقہ حکام بھی اس موقع پر موجود تھے۔
