کراچی (رپورٹنگ آن لائن) گورنرسندھ عمران اسماعیل نے کہا کہ گرین لائن منصوبہ پایہ تکمیل تک پہنچ رہا ہے ، وزیراعظم خود کراچی آکر گرین لائن منصوبے کاافتتاح کریں گے، بسوں کی پہلی کھیپ 15روز تک پورٹ پرپہنچ جائےگی۔تفصیلات کے مطابق گورنرسندھ عمران اسماعیل نے بانی پاکستان قائداعظم کی برسی کے موقع پر مزارقائد پر حاضری دی ،
اس موقع پر میڈیا سے گفتگو کرتے ہوئے انہوں نے کہا کہ قوم نے یکجاہوکر مسائل اور چیلنجز کا مقابلہ کیاہے،قائدکے اصولوں کے تحت پاکستان کو خوشحال بنائیں گے ۔انہوں نے کہا کہ پاکستان ایک پرامن اور مستحکم افغانستان کا خواہاں ہے، پاکستان کی کوشش رہی پرامن طریقے سے افغانستان سے غیر ملکی فورسس کا انخلاہو، پاکستان چاہتا ہے افغان قوم اپنافیصلہ خودکرے ،حکومت پاکستان مسلسل اپنے سفارتخانہ کےساتھ رابطے میں ہے،
گورنرسندھ نے کہا کہ سیاسی اختلافات کے باوجودتمام جماعتیں متفق ہیں سی پیک بنناچاہیے،سی پیک کا بننا پاکستان کیلئے خوش آئند ہے لیکن آج کے روز ہمیں کشمیریوں کو بھی نہیں بھولناچاہیے،گرین لائن منصوبے کے حوالے سے ان کا کہنا تھا کہ گرین لائن منصوبہ پایہ تکمیل تک پہنچ رہاہے ، گرین لائن کیلئے40بسوں کی دوسری شپمنٹ تیار ہے، بسوں کی پہلی کھیپ 15روز تک پورٹ پرپہنچ جائےگی، وزیراعظم خود کراچی آکر گرین لائن منصوبے کاافتتاح کریں گے۔
