راولپنڈی / پشاور(رپورٹنگ آن لائن)وزیراعظم عمران خان اور آرمی چیف جنرل قمر جاوید باجوہ نے پشاور کور ہیڈ کوارٹرز کا دورہ کیا۔آئی ایس پی آر کے مطابق وزیراعظم عمران خان اور آرمی چیف جنرل قمر جاوید باجوہ نے پشاور کور ہیڈ کوارٹرز کا دورہ کیا۔ اس موقع پر گورنر اور وزیراعلیٰ خیبرپختونخوا بھی وزیراعظم کے ہمراہ تھے۔آئی ایس پی آر کے مطابق پشاور کور ہیڈ کوارٹرزآمد پر وزیراعظم نے یادگار شہدا پر پھولوں کی چادر چڑھائی جبکہ وزیراعظم کو سیکیورٹی کی موجودہ صورتحال، جاری اسٹیبلائزیشن آپریشنز اور پاک افغان بارڈر پر باڑ لگانے سے متعلق بریفنگ دی گئی۔ وزیر اعظم نے بارڈر مینجمنٹ اور فینسنگ پر اظہار اطمینان کیا۔وزیراعظم کو نئے ضم شدہ اضلاع’این ایم ڈیز’ میں جاری سماجی و اقتصادی ترقیاتی منصوبوں کے بارے میں بھی تفصیل سے آگاہ کیا گیا، پاک افغان بین الاقوامی سرحد پر سیکیورٹی کی بدلتی صورتحال سے نمٹنے کیلئے اٹھائے گئے اقدامات سے بھی آگاہ کیا گیا۔
اس موقع پر وزیر اعظم نے سماجی اور معاشی منصوبوں کیلئے بہتر ماحول اور سیکیورٹی فراہم کرنے کی تعریف کی، پاکستان کے جامع بارڈر مینجمنٹ رجیم کی افادیت، مو ثر سرحدی کنٹرول اور داخلی سلامتی کو یقینی بنانے کیلئے کیے جانے والے عملی اقدامات پر اطمینان کا اظہار کیا ۔خیبر پختونخواہ میں ضم شدہ اضلاع میں ترقیاقی منصوبوں کی تکمیل کی تعریف کرتے ہوئے وزیراعظم نے کہا کہ علاقے کے پائیدار استحکام اور پائیدار ترقی کیلئے ٹھوس اقدامات اہم ہیں۔ وزیراعظم نے کووڈ ، ٹڈی دل ،پولیو اور شجرکاری مہم میں سول انتظامیہ کیساتھ تعاون کو بھی سراہا۔
