اسلام آباد (رپورٹنگ آن لائن)وزیراعظم محمد شہباز شریف نے ہدایت کی ہے کہ بندرگاہوں میں پڑے متروکہ کارگو کی نیلامی کے لئے شفاف نظام لایا جائے، پاکستان کی تمام بندرگاہوں کی توسیع پر کام تیز کیا جائے تاکہ بڑے جہاز لنگر انداز ہو سکیں ۔
بدھ کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف کی زیر صدارت معاشی ترقی کے لئے بندرگاہوں کے حوالے سے تشکیل دیئے گئے نجی شعبے کے ورکنگ گروپ کا اجلاس منعقد ہوا۔ اجلاس میں وفاقی وزرا ء احسن اقبال، احد خان چیمہ، محمد جنید انوار چوہدری، مصدق ملک، وزیر مملکت بلال اظہر کیانی، معاون خصوصی ہارون اختر اور متعلقہ اعلیٰ سرکاری افسران شریک ہوئے۔
وزیراعظم کو کاروباری برادری کیلئے بندرگاہوں پر سہولیات اور اصلاحات کے حوالے سے سفارشات پیش کی گئیں۔ وزیراعظم نے کہا کہ ملک میں کاروبار بڑھانے اور معاشی ترقی کے لئے ہماری بندرگاہوں کا انتہائی اہم کردار ہے۔ وزیراعظم نے ہدایت کی کہ کاروباری برادری کی سہولت کے لئے بندرگاہوں سے منسلک مختلف ادارے آپس میں تعاون کو مزید بہتر بنائیں تاکہ کارگو کا ڈویل ٹائم (Dwell Time) کم سے کم ہو سکے، مختلف نوعیت کے پورٹ چارجز کو مزید کم کیا جائے۔
انہوں نے ہدایت کی کہ بندرگاہوں میں پڑے متروکہ کارگو کی نیلامی کے لئے ایک شفاف نظام لایا جائے، متروکہ کارگو کے لئے ملک کی مختلف بندرگاہوں میں الگ یارڈز بنائے جائیں اور اس کے لئے عالمی شہرت یافتہ کمپنیوں کی خدمات لی جائیں۔ انہوں نے کارگو کی جانچ کے لئے ابتدائی ٹیسٹنگ لیب بندرگاہوں پر ہی بنانے کی ہدایت کرتے ہوئے کہا کہ کارگو کے غیر ضروری لیبارٹری ٹیسٹ کا خاتمہ کیا جائے۔ انہوں نے ہدایت کی کہ پاکستان کی تمام بندرگاہوں کی ڈریجنگ اور توسیع پر کام تیز کیا جائے تاکہ بڑے جہاز لنگر انداز ہو سکیں۔
وزیراعظم نے کہا کہ اندرون ملک کارگو کے نقل و حمل کے لئے بندرگاہوں سے ریل کی کنکٹیویٹی کو مزید بہتر کیا جائے۔ وزیراعظم نے زیاد بشیر کی سربراہی میں ورکنگ گروپ کی محنت اور ٹھوس تجاویز کو سراہا۔ زیاد بشیر نے کہا کہ پی آئی اے کی شفاف نجکاری سے پاکستان کی کاروباری برادری کے اعتماد میں بے حد اضافہ ہوا ہے۔ اجلاس میں وزیراعظم کو بریفنگ میں بتایا گیا کہ نیشنل پورٹس ماسٹر پلان پر کام تیزی سے جاری ہے، پورٹ کمیونٹی سسٹم حال ہی میں آپریشنل کیا جا چکا۔
بریفنگ میں بتایا گیا کہ پاکستان کی بندرگاہوں پر مختلف فیسوں میں کمی لائی جا رہی ہے اور حال ہی میں پورٹ قاسم میں بلک کارگو کی فیسوں میں 50 فیصد سے زیادہ کمی کی گئی، پاکستان کی مختلف بندرگاہوں میں نئی سرمایہ کاری سے ان کی کارکردگی بہتر ہو رہی ہے۔ بریفنگ میں بتایا گیا کہ متروکہ کارگو کی نیلامی کے لئے بہت جلد ای-بڈنگ کا نظام لایا جا رہا ہے جس کے ذریعے ملک بھر سے کوئی بھی شخص کسی بھی جگہ بیٹھے حصہ لے سکے گا، کراچی کی بندرگاہوں کی توسیع اورڈریجنگ کے لئے ٹینڈر دیئے جا چکے ہیں اور کام بہت جلد شروع ہو جائے گا۔
