لاہور(رپورٹنگ آن لائن)وزیراعظم شہباز شریف اور مسلم لیگ (ن) کے صدر نواز شریف کی زیر صدارت آئندہ مالی سال کے بجٹ سے متعلق اجلاس میں وفاقی، صوبائی سطح پر عوام کو ریلیف دینے سے متعلق اقدامات پر تجاویز لی گئیں۔جاتی امراء رائے ونڈ میں منعقدہ اجلاس میں وزیر اعلیٰ پنجاب مریم نواز شریف ،نائب وزیراعظم اسحاق ڈار، وفاقی وزرا ء مصدق ملک، اویس لغاری رانا تنویر حسین، عطا تارڑ، پرویز رشید ،جام کمال اور دیگر شریک ہوئے۔
ذرائع کے مطابق اجلاس میں وفاقی وزراء ، سیکرٹریز نے اپنے محکموں سے متعلق ممکنہ ریلیف اقدامات کی تجاویز پیش کیں جبکہ پارٹی قائدین نے بھی عوام کو ہر ممکنہ ریلیف کے لئے اپنی اپنی تجاویز شرکاء کے سامنے رکھیں۔ اجلاس میں تین نکاتی ایجنڈے پر تفصیلی مشاورت اور پارٹی قائدین کو بریفگ دی گئی۔
ذرائع کے مطابق تین گھنٹے جاری جاری رہنے والے مشاورتی اجلاس میں آئندہ بجٹ میں عوام کو ہر ممکن ریلیف دینے کے اقدامات کی تجاویز پر تمام شرکاء نے تفصیلی تبادلہ خیال کیا، وفاقی و صوبائی سطح پر عوام کو ہر ممکن ریلیف دینے کے حوالے سے اقدامات بارے تجاویز لی گئیں۔
وزیراعلی پنجاب مریم نواز نے صوبائی حکومت کی جانب سے بھرپور ریلیف فراہم کرنے کے اقدامات تجویز کئے ۔ اجلاس میںسابق وزیراعظم نواز شریف نے مشاورتی اجلاس میں اپنے وسیع تر سیاسی و انتظامی تجربے کی بنیاد پر ہدایات بھی جاری کیں۔
