اسلام آباد(رپورٹنگ آن لائن) وزیر اعظم کے معاون خصوصی شہباز گل نے کہا ہے کہ اصلاحات کی بدولت آج کورونا کے باوجود معاشی اعشاریے مثبت ہیں، ہم پاکستان بنانے جبکہ متحدہ کرپٹ الائنس کمانے کی نیت سے آئے تھے،
تفصیل کے مطابق ہفتہ کو سماجی رابطے کی سائٹ ٹوئٹر پر اپنے بیان میں معاون خصوصی شہباز گل نے کہا کہ پاکستان سٹیزن پورٹل کے 2سال مکمل ہوگئے، ایپلی کیشن پر اب تک 27لاکھ شکایات موصول ہوچکیں، پورٹل پر 94فیصد شکایات اب تک حل کی جاچکیں، یہ ہے خدمت کی سیاست جس پر وزیراعظم اور ان کی ٹیم یقین رکھتی ہے۔
شہباز گل کا کہنا تھا وزیراعظم کی کوششوں سے ہر شعبے میں نمایاں بہتری آنے لگی، ڈی آئی آر بی ایس سسٹم سے موبائل فون سمگلنگ کا خاتمہ ہوگیا، سسٹم سے ملکی خزانے کو 32ارب کا فائدہ ہوا، موبائل فون سمگلنگ کے خاتمے سے ریونیو 54 ارب تک پہنچ گیا، سٹاک مارکیٹ 1213پوائنٹس اضافے سے 42281پوائنٹس پر چلی گئی۔
