اسلام آباد (رپورٹنگ آن لائن)صدر مملکت عارف علوی نے کہاہے کہ وزارت سائنس و ٹیکنالوجی جدید الیکٹرانک ووٹنگ مشین تیاری کے عمل کو مزید تیز کرے، انتخابی عمل میں شفافیت کیلئے ملک میں آئی ووٹنگ کا نظام متعارف کرانے کی ضرورت ہے،انٹرنیٹ ووٹنگ سے سمندر پارپاکستانیوں کو سہولت اورانتخابی عمل میں بہتر ی آئے گی۔صدر مملکت ڈاکٹر عارف علوی کی زیرِ صدارت انٹرنیٹ ووٹنگ پر ذیلی کمیٹی کا اجلاس ہوا جس میں وفاقی وزیر آئی ٹی سید امین الحق، وزیر ریلوے سینیٹر محمد اعظم خان سواتی کے علاوہ وفاقی وزیر سائنس و ٹیکنالوجی سینیٹر شبلی فراز ، سیکریٹری آئی ٹی شعیب احمد صدیقی اور چیئرمین نادرا نے شرکت کی ۔
صدر مملکت نے کہاکہ وزارت سائنس و ٹیکنالوجی جدید الیکٹرانک ووٹنگ مشین تیاری کے عمل کو مزید تیز کرے۔انہوںنے کہاکہ انتخابی عمل میں شفافیت کیلئے ملک میں آئی ووٹنگ کا نظام متعارف کرانے کی ضرورت ہے۔ انہوںنے کہاکہ انٹرنیٹ ووٹنگ سے سمندر پارپاکستانیوں کو سہولت اورانتخابی عمل میں بہتر ی آئے گی۔
اجلاس کے در ان وزیر ِسائنس و ٹیکنالوجی ،سینیٹر شبلی فراز نے الیکٹرانک ووٹنگ مشین کی تیاری کیلئے اقدامات پر بریفنگ دی ۔ سینیٹر شبلی فراز نے کہاکہ وزارت سائنس و ٹیکنالوجی اور متعلقہ ادارے مشترکہ طور پر مشین کا ابتدائی ماڈل تیار کر رہے ہیں ۔
صدر مملکت نے کہاکہ انتخابی عمل کی ساکھ محفوظ بنانے کے کیلئے انتخابی سامان کی سیکورٹی اور دیگر عوامل کو فول پروف اور شفاف ہونا چاہئے۔ اعلامیہ کے مطابق نادرا الیکشن کمیشن کے ساتھ آئی ووٹنگ میں سہولت فراہم کرے گا، انٹرنیٹ ووٹنگ اور الیکٹرانک ووٹنگ مشین پر پیشرفت کا جائزہ لینے کے لئے ہفتہ وار اجلاس بلائے جائیں گے۔صدر مملکت نے ووٹنگ مشین کا ابتدائی ماڈل تیار کرنے کے پر وزارتِ سائنس اینڈ ٹیکنالوجی کی کاوشوں کو سراہا۔
