اسلام آباد(رپورٹنگ آن لائن)وفاقی وزیرِ ریلوے محمد حنیف عباسی نے ریلوے کوارٹرز کی بوگس الاٹمنٹ سے متعلق ڈی جی ویجیلنس عبدالرب چوہدری کی شاندار انکوائری پر انہیں اور ان کی ٹیم کو زبردست خراجِ تحسین پیش کیا ہے۔
ترجمان وزارت ریلوے کے مطابق وزیرِ ریلوے نے کہا کہ ڈی جی ویجیلنس نے پیشہ ورانہ مہارت اور دیانتداری کے ساتھ ایک بڑے مالی گھپلے کا پردہ فاش کیا، جس سے کرپشن مافیا کے چہروں سے نقاب الٹ گیا۔ انہوں نے کہا کہ بدعنوانی اور رشوت کے اس سکینڈل میں ملوث افسران اور ملازمین کو قانون کے مطابق نشانِ عبرت بنایا جائے گا۔
محمد حنیف عباسی نے کہا کہ وزارتِ ریلوے میں شفافیت اور احتساب کے اصولوں پر کوئی سمجھوتہ نہیں کیا جائے گا۔ ان کے مطابق ایماندار افسران کو سراہا جائے گا جبکہ بدعنوان عناصر کے خلاف سخت کارروائی کی جائے گی۔انہوں نے بتایا کہ ڈی جی ویجیلنس عبدالرب چوہدری وزارتِ ریلوے کے اصلاحاتی وژن کے عین مطابق شفافیت اور احتساب کے اصولوں پر عمل پیرا ہیں۔
وزیرِ ریلوے نے بوگس الاٹمنٹ کیس کی غیرجانبدار تحقیقات جاری رکھنے کی ہدایت بھی جاری کی۔مزید برآں وفاقی وزیرِ ریلوے نے کل لاہور ریلوے ہیڈکوارٹر میں اس معاملے پر ایک اہم اجلاس طلب کر لیا ہے، جس میں آئندہ لائحہ عمل، احتسابی اقدامات اور نظام میں شفافیت کے فروغ کے لیے تجاویز پر مشاورت کی جائے گی۔
