اسلام آباد (رپورٹنگ آن لائن)وفاقی وزیر مواصلات عبدالعلیم خان نے کہا ہے مسلم لیگ ن اور پیپلز پارٹی سیاسی بیانات کی بجائے اپنے اپنے صوبوں کی ترقی پر توجہ مرکوز کریں، سندھ اور پنجاب میں منتخب وزرائے اعلیٰ موجود ہیں،بہتر ہو گا کہ انہیں جہاں سے مینڈیٹ ملا ہے وہاں کام کیا جائے.
عبدالعلیم خان نے کہا لوگوں کو سیاسی بیان بازی نہیں بلکہ اپنے بنیادی مسائل کے حل میں دلچسپی ہے اور امید ہے کہ یہ سلسلہ اب بند ہوجائے گا، وفاقی وزیر عبدالعلیم خان نے کہا مسلم لیگ ن اور پیپلز پارٹی کو شہریوں کی فلاح و بہبود پر توجہ دینا ہوگی،ملک و قوم کا استحکام اور نظام کا تسلسل اصل ترجیح ہے ، صدر استحکام پاکستان پارٹی اور وفاقی وزیر عبدالعلیم خان نے کہا سیاسی پختگی اور حالات کا تقاضا ہے کہ ذمہ دارانہ رویہ اپنا یا جائے .
توقع ہے کہ پیپلز پارٹی وفاقی حکومت کی سپورٹ جاری رکھے گی۔انہوں نے کہا کہ ایک دوسرے پر الزامات عائد کر کے ہم سیاسی نظام اور عوام کی خدمت نہیں کر سکتے لہذا استحکام پاکستان پارٹی دونوں سیاسی جماعتوں مسلم لیگ ن اور پیپلز پارٹی کے رہنماؤں سے توقع رکھتی ہے کہ گزشتہ دنوں سے جاری بیان بازی کو ختم کیا جائے گا ۔
