لاہور (رپورٹنگ آن لائن ) قومی احتساب بیورو (نیب) نے چودھری برادران کے خلاف 20 سال بعد تمام کیسز بند کر تے ہوئے لاہور ہائی کورٹ میں باضابطہ طور پر بتایا ہے کہ ادارے سے چوہدری برادران کے خلاف تحقیقات بند کردی ہیں۔
تفصیلات کے مطابق جسٹس صداقت علی کی سربراہی میں 2 رکنی بنچ نے چودھری برادران کی چیئرمین نیب کے اختیارات کیخلاف درخواست پر سماعت کی۔ ڈی جی نیب شہزاد سلیم رپورٹ سمیت عدالت میں پیش ہوئے۔ درخواستگزار نے موقف اپنایا کہ نیب سیاسی انجینئرنگ کرنیوالے ادارہ ہے، نیب کے کردار اور تحقیقات کے غلط انداز پر عدالتیں فیصلے بھی دے چکی ہیں، نیب نے 20 سال قبل آمدن سے زائد اثاثہ جات کی مکمل تحقیقات کیں مگر ناکام ہوا، ہمارا سیاسی خاندان ہے،
سیاسی طور انتقام کا نشانہ بنایا جاتا رہا ہے۔ وکیل چودھری برادران نے کہا کہ چودھری پرویز الہی کے خلاف بطور وزیر بلدیات کرپشن کے الزامات عائد کیے گئے مگر کوئی ٹھوس شواہد نہ ملے، کسی بھی مالی ادارے کی جانب سے نیب کو کرپشن کے شواہد نہ ملے، بے داغ سیاسی کیریئر کے حامل ہیں، کبھی کرپشن نہیں کی، عدالت سے استدعا ہے کہ نیب کا 20 برس پرانے آمدن سے زائد اثاثہ جات کی انکوائری دوبارہ کھولنے کا اقدام غیر قانونی قرار دیا جائے۔
ڈپٹی پراسکیوٹر جنرل نیب نے عدالت کو بتایا کہ چودھری پرویز الہی، چودھری شجاعت حسین اور دیگر خاندان کیخلاف انکوائری بند کر دی۔ عدالت نے غیر موثر ہونے پر چودھری برادران کی درخواستیں نمٹا دیں۔
