اسلام آباد (رپورٹنگ آن لائن )مسلم لیگ(ن) کے سینئر رہنما و سینیٹر پرویز رشید نے کہا ہے کہ آج سپریم کورٹ سے آواز بلند ہو رہی ہے کہ نیب سیاسی انجینئرنگ میں ملوث ہے،احتجاج سے جمہوریت کو لپیٹ دیا جاتا ہے ،موجودہ مسائل کا حل ان ہاﺅس تبدیلی نہیں بلکہ فوری الیکشن کے انعقاد میں ہے ۔
اتوار کے روز نجی ٹی وی سے گفتگو کرتے ہوئے سینیٹر پرویز رشید کاکہنا تھا کہ اگر احتجاج کی کال دینا ہوتی تو 25 جولائی 2018ء کو ہی دے دیتے لیکن سےاسی جماعتوں نے سیکھ لیا ہے کہ احتجاج کے باعث جمہوریت بھی لپیٹ دی جاتی ہے، عوام انتخابات کو شفاف نہیں سمجھتے اسی لیے سیلکٹڈحکومت کہا جاتا ہے۔
اس وقت 2018 کے تجربے کودہرانا مشکل ہو چکا ہے کیونکہ جو تجربہ کیا گیا وہ منہ کے بل زمین پر گر چکا ہے،انہوں نے کہا کہ اِن ہا ﺅس تبدیلی کے لیے اپوزیشن کے پاس نمبر پورے نہیں ہیں، سیاسی جماعتیں بار بار نئے الیکشن کا مطالبہ کر رہی ہیں، ملک کو جس دلدل میں پھنسایا گیا، اس کا واحد حل انتخابات ہی ہیں، اس وقت کہنے کو پارلیمانی لیکن عملاً صدارتی نظام نافذ ہے۔
انہوں نے مزید کہا کہ حکومت میں دہری شہریت اور مفادات کے ٹکراﺅ والے لوگ موجود ہیں، سیاسی جماعتوں کو عوام کے جذبات کی ترجمانی کرنا پڑے گی۔ انہوں نے کہا کہ اے پی سی میں سڑکوں پر آنے کا فیصلہ باہمی مشاورت سے کریں گے۔
