اسلام آباد (رپورٹنگ آن لائن)پیپلز پارٹی کے مرکزی سیکرٹری جنرل نیئر بخاری نے کہا ہے کہ نگران وزیراعظم کے نام پر بات کرنا رانا ثنا ء اللہ کا استحقاق نہیں ہے۔
نجی ٹی وی سے گفتگو کرتے ہوئے نیئربخاری نے کہاکہ نگران وزیراعظم کے معاملے پر رانا ثناء اللہ کو بات نہیں کرنی چاہیے تھی،یہ پارٹی ہیڈ کا کام ہے،نگران وزیر اعظم کیلئے سول سرونٹ کا نام بھی شامل ہے۔انہوںنے کہاکہ نگران وزیراعظم کیلئے ابھی تک حفیظ شیخ کے نام پر اتفاق نہیں ہوا اور رانا ثنا ء اللہ کو بھی حفیظ شیخ کے نام سے متعلق بات نہیں کرنی چاہیے تھی،نگران وزیراعظم کیلئے ایک نہیں کئی ناموں پر مشاورت ہو رہی ہے۔
نیئر بخاری نے کہاکہ مردم شماری کی منظوری کے بعد ایک بات واضح ہے سیٹیں نہیں بڑھ رہیں، سیٹیں بڑھانے کیلئے پارلیمنٹ سے آئینی ترمیم ضروری ہے۔مرکزی رہنما پیپلزپارٹی نے کہاکہ آئین میں کہیں نہیں لکھا ہواکہ آبادی بڑھنے سے سیٹیں بڑھیں گی، الیکشن آگے بڑھتے ہیں تو کسی کو کوئی نقصان نہیں ہوتا جس نے کام کیا ہوگا ووٹ اس کو ملیں گے۔
