شہباز اکمل جندران۔۔۔
کورونا وائرس کی دوسری لہر کے پیش نظر پنجاب سمیت ملک بھر میں رواں سال بھی نویں اور دسویں جماعت میں سائنس کے طالبعلم پریکٹیکل امتحان نہیں دے سکیں گے۔اور نہ ہی ان کی پریکٹیکل کی نوٹ بکس یا کاپیاں چیک کی جائینگی۔
تاہم ذرائع سے معلوم ہوا ہے کہ پنجاب کریکولم اینڈ ٹیکسٹ بک بورڈ نے رواں سال کے تعلیمی سیشن کے لئے بھی پریکٹیکل کی نوٹ بکس چھاپنے کے لئے مختلف پرنٹرز اور پبلشرز کو کام الاٹ کردیا ہے۔
اس سلسلے میں پری کو آلیفکیشن کےپراسیس میں 98 فرموں نے حصہ لیا۔جن میں سے 86فرموں کوپری کوالیفائی کیا گیا۔جبکہ ان میں سے 66 فرموں نے ٹیکنیکل اور فنانشل بڈز کے ساتھ کاغذ کے سیمپل بھی جمع کروائے۔
جنہیں پی سی ٹی بی نے 25 کروڑ 24 لاکھ روپے کی 9 ویں اور 10ویں جماعت کی پریکٹیکل کی نوٹ بکس چھاپنے کا کام الاٹ کردیا ہے۔
حالانکہ اس سال نویں اور دسویں جماعت میں سائنس کے مضامین کے پریکٹیکل لیئے ہی نہیں جائینگے۔
اس سلسلے میں گفتگو کرتے ہوئے پنجاب کریکولم اینڈ ٹیکسٹ بک بورڈ کے قائمقام ڈائریکٹر پروڈکشن محمد اختر بٹ کا کہنا ہے کہ پریکٹیکل ہوں یا نہ ہوں پریکٹیکل کی نوٹ بکس چھاپی جائینگی۔کیونکہ اس کے لیئے متعلقہ اداروں PMIU…PEF…..PIEMA…LWWF سمیت دیگر کے Indent کے بعد نوٹ بکس چھاپی جارہی ہیں۔
