سکھر (رپورٹنگ آن لائن ) مسلم لیگ ن کے قائد نواز شریف نے پیپلز پارٹی کے رہنما خورشید شاہ سے ٹیلی فونک رابطہ کر کے خورشید شاہ کو ضمانت پر رہائی کی مبارکباد دی۔
تفصیلات کے مطابق دونوں رہنماوں کے درمیاں موجودہ ملکی سیاسی صورتحال اور باہمی دلچسپی کے امور پر بھی تبادلہ خیال ہوا، دونوں رہنماوں نے موجودہ معاشی صورتحال پر تشویش کا اظہار بھی کیا۔ مسلم لیگ ن کے قائد اور خورشید شاہ کا پارلیمنٹ کے اندر مشترکہ لائحہ عمل تیار کرنے پراتفاق ہوا۔
اس موقع پر پیپلز پارٹی کے رہنما خورشید شاہ نے کہاکہ ملک کے موجودہ حالات کا تقاضا ہے کہ اپوزیشن جماعتیں متحد ہوں، ماضی کو بھلا کر سلیکٹڈ حکومت سے عوام کی جان چھڑائی جائے۔ اپوزیشن جماعتوں کے درمیان اتفاق رائے کے لیے خورشید شاہ نے کردار ادا کرنے کی پیشکش بھی کی۔
ٹیلی فونک رابطے کے دوران قائد مسلم لیگ ن نے کہاکہ دو سال تک آپ کو پابند سلاسل رکھ کر سیاسی انتقام کا نشانہ بنایا گیا، حکومت کا سارا زور عوام کو ریلیف دینے کے بجائے اپوزیشن رہنماں پر جھوٹے مقدمات بنانے پر لگا رہا۔ سید خورشید شاہ نے مسلم لیگ ن کے قائد کا رہائی پر مبارکباد دینے پر شکریہ ادا کیا۔
