راولپنڈی(رپورٹنگ آن لائن)وزیر ریلوے شیخ رشید نے کہا ہے کہ نوازشریف نے نہیں آنا تھا اور انہوں نے یہ ثابت بھی کردیا۔ جمعرا ت کوراولپنڈی میں میڈیا سے گفتگو کرتے ہوئے شیخ رشید نے کہا کہ نواز شریف پچھلے 10ماہ سے سیر و تفریح کر رہے ہیں لیکن واپس نہیں آرہے، انہوں نے نہیں آنا تھا یہ ثابت کردیا۔
وزیرریلوے نے کہا کہ اے پی سی اور رہبر کمیٹی کی ناکامی کا اعلان کرتا ہوں، یہ عمران خان کا کچھ نہیں بگاڑ سکتے، مولانا صاحب جلسہ جلسہ کھیلیں گے اور اپوزیشن کی اے پی سی سے کچھ نہیں ہوگا، عنقریب اپوزیشن کے برے حالات ہوں گے، مریم نواز کی پوری سیاست اس بات پر ہے کہ انہیں لندن جانے دیا جائے۔
شیخ رشید نے کہا کہ کراچی میں وزیراعظم نے وہی کیا جو وزیراعظم کو کرنا چاہیے تھا، مرکز اور صوبے کو مل کر کام کرنا چاہیے، یہ بحث نہیں کرنی چاہیے کہ ایک روپیہ کس نے دیا دو روپے کس نے دیے۔
