لاہور ( رپورٹنگ آن لائن) پاکستان مسلم لیگ (ن) کے صدر و سابق وزیر اعظم محمد نوازشریف سے سب بڑی عالمی کرپٹو کرنسی ایکسچینج ڈیننس کے سابق سی ای او اور بانی چانگ پنگ ژائو نے ملاقات کی ۔
وزیراعلیٰ پنجاب مریم نوازشریف اورپاکستان کرپٹو کونسل کے سی ای او بلال بن ثاقب بھی ملاقات میں موجود تھے ۔ قائد محمد نواز شریف اور وزیراعلیٰ مریم نواز شریف نے چانگ پنگ ژائو کی پاکستان کرپٹو کونسل کے سٹریٹجک ایڈوائزر کے طورپر تقررکا خیر مقدم کیا ۔چانگ پنگ ژائو کا تقرر ویب تھری اور ڈیجیٹل فنانس میں ریجنل ہب کے طور پر پاکستان کی شناخت کے اظہار کے لئے معاون قرار دیا ۔
ملاقات میں ملک میں ڈیجیٹل اکانومی پر تبادل خیال کرنے کے ساتھ اختراعی علوم کے ذریعے ترقی کے ویژن کو اپنانے پر اتفاق کیا گیا ۔ ڈیننس کے بانی نے پاکستان میں تین مرتبہ وزیر اعظم رہنے والے مسلم لیگ (ن) کے قائد محمد نوازشریف کے ایمرجنگ ٹیکنالوجیز کے فروغ کے وژن کو خراج تحسین پیش کیا ۔ملاقات میں ڈیجیٹل اثاثہ جات اور فیوچرٹیکنالوجی میں نوجوانوں کی شراکت کے امور پر بھی گفتگو ہوئی جبکہ چانگ پنگ زا نے ابھرتی بلاک چین ٹیکنالوجی اورگلوبل انٹر پرینیور شپ کے امکانات سے آگاہ کیا۔
ڈیجیٹل ٹرانسفارمیشن کے لئے جدید علوم کے رجحانات کے فروغ پر اتفاق کیا گیا ۔ اس موقع پر محمد نواز شریف نے کہا کہ مسٹر ژائو جیسی قابل قدر شخصیات سے ملاقات میں ترقی اور مواقع کی نئی راہیں ہموار ہوتی ہیں۔ پاکستان اختراعی تبدیلیوں کا شراکت دار بننے کے لئے تیار ہے،پاکستان کو دورجدید کے تقاضوں کے مطابق تیز ی سے بدلتی ہوئی ٹیکنالوجیز کو اپنانا ہوگا۔
وزیر اعلیٰ پنجاب مریم نواز شریف نے کہا کہ نوجوانوں کو آئی ٹی سکلز سکھا کر عالمی ڈیجیٹل مارکیٹ کے لئے تیار کررہے ہیں ،پنجاب مستقبل کی ٹیکنالوجیز کو اپنانے کے لئے بالکل تیار ہے۔ہماری پوری توجہ نالج بیسڈ ٹیکنالوجی پر مرکوز ہے۔ نالج بیسڈ ٹیکنالوجی نئی جنریشن کو اختراعی اور ڈیجیٹل انٹر پرائز کی راہ گامزن کرے گی۔ چانگ پنگ ژائو نے ڈیجیٹل علوم میں پاکستانی نوجوانوں کی صلاحتیوں کو سراہا۔ڈیننس کے سی اوچانگ پنگ ژائو نے شاندار میزبانی پر مسلم لیگ(ن) قائد محمد نوازشریف کا شکریہ ادا کیا۔
