اسلام آ باد (رپورٹنگ آن لائن ) وفاقی وزیر فیصل واڈا قومی اسمبلی کی رکنیت سے مستعفی ہوگئے ،فیصل واوڈا کے وکیل نے عدالت کو بتایا کہ ان کے موکل نے بطور رکن قومی اسمبلی استعفی دے دیا ہے جس کے بعد ان کی نااہلی کی درخواست غیر موثر ہوگئی ہے۔
بدھ کو اسلام آباد ہائی کورٹ کے جسٹس عامر فاروق نے تحریک انصاف کے رہنما فیصل واوڈا کی نااہلی سے متعلق درخواست پر سماعت کی۔ فیصل واوڈا کے وکیل نے عدالت عالیہ کے سامنے بیان دیا کہ ان کے موکل قومی اسمبلی کی رکنیت سے مستعفی ہوچکے ہیں۔ اب یہ کیس غیر موثر ہوچکا ہے۔ اس موقع پر فیصل واوڈا کے وکیل نے استعفے کی نقل بھی پیش کردی۔
درخواست گزار کے وکیل جہانگیر جدون نے عدالت کے روبرو موقف اختیار کیا کہ فیصل واوڈا نے گیارہ جون 2018 کو کہا کہ وہ دہری شہریت نہیں رکھتے جب کہ امریکی شہریت چھوڑنے کے سرٹیفکیٹ کے مطابق فیصل واوڈا نے 25 جون کو دہری شہریت چھوڑی۔
جب تک الیکشن کمیشن میں استعفی نہیں پہنچتا تب تک اس استعفے کی کوئی قانونی حیثیت نہیں۔ واضح رہے کہ فیصل واوڈا کی نااہلی کے لئے الیکشن کمیشن میں بھی درخواست زیر سماعت ہے۔
