اسلام آ باد (رپورٹنگ آن لائن) معاون خصوصی برائے سیاسی ابلاغ ڈاکٹر شہباز گل نے کہا ہے کہ نااہل شریف کا نام کرپشن کی ڈکشنری میں سنہرے حروف میں درج ہو گا۔
تفصیلات کے مطابق معاون خصوصی برائے سیاسی ابلاغ ڈاکٹر شہباز گل نے شہباز شریف کے بیان پر ردعمل دیتے ہوئے کہا ہے کہ نااہل شریف اور درباریوں کی باجماعت پریس کانفرنس جھوٹ کا ملغوبہ ہے۔ انہوں نے کہا کہ نااہل شریف کرپشن کا استعارہ ہیں ، شہباز شریف ایف آئی اے کو 25 ارب روپے منی لانڈرنگ کا جواب نہیں دے سکے ، منی لانڈرنگ میں شوگر ملز ہی کے 20 ملازمین کے بینک اکاونٹس استعمال کیے گئے ، شہبازشریف کے 2003میں ڈیکلیئرڈ کل اثاثے ایک کروڑ 80لاکھ تھے ، وزارتِ اعلی کے 10برسوں میں ٹی ٹیز کی برکتوں سے یہ اثاثے 8ارب سے زائد ہوئے۔
معاون خصوصی برائے سیاسی ابلاغ ڈاکٹر شہباز گِل نے کہا کہ شہباز شریف کے اثاثے 70گنا اور حمزہ شہباز کے اثاثوں میں 3ہزار گنا اضافہ کالے دھن سے ہوا ، منی لانڈرنگ کے چمپئن سلمان شہباز کے اثاثے 8ہزار گنا بڑھے ، 32 کمپنیوں مالک سلمان شہباز کی پارسائی کی کہانیاں شوباز شریف قوم کو نہ سنائیں ، 5 مرلے کے گھر میں رہنے والی شہباز فیملی کے ملازم ملک مقصود کے بینک اکاونٹ میں 7ارب روپے کہاں سے آئے؟ ڈاکٹر شہباز گِل نے کہا کہ دبئی کی 4کمپنیاں شہباز خاندان کی خواتین کے اکاونٹس میں کیوں پیسے بھجواتی رہیں؟ کل تک تو آپ کہتے رہے کہ میرے بچے کیسے ارب پتی ہوئے مجھے نہیں پتا ، آج مفرور بیٹے کے اکانٹ ایکٹیویشن پر آپکے بھنگڑے نہیں ختم ہو رہے۔
