لاہور (رپورٹنگ آن لائن) پاکستان تحریک انصاف کی مرکزی رہنما مسرت جمشید چیمہ نے کہا ہے کہ موجودہ حکومت صرف مقدمات ختم کروانے کے لئے آئی ،قوم حقیقی آزادی کے لئے تیار ہے، باشعور اور حقیقی آزادی کے مطلب سے واقف ہوچکی ہے۔لاہور میں پریس کانفرنس کرتے ہوئے مسرت جمشید چیمہ نے کہا کہ پاکستان میں سب کے حقوق ہیں سوائے مزدور کے، مزدور ایسا بدقسمت طبقہ ہے جس کو اس کی اجرت نہیں ملتی،
عمران خان کے دور میں سب سے زیادہ مزدور طبقے کو فائدہ ہوا، ہمارے دور میں کسانوں کی آمدنی میں ریکارڈ اضافہ ہوا، صنعتی ترقی سے مزدوروں کی آمدنی میں اضافہ ہوا تھا۔پی ٹی آئی دور میں کسانوں کو 2600 ارب روپے کا فائدہ ہوا۔انہوں نے کہا کہ عمران خان نے مزدوروں کے لیے احساس پروگرام شروع کیا، پناہ گاہوں میں عمران خان خود مزدوروں کے ساتھ بیٹھ کر کھانا کھاتے تھے، احساس پروگرام سے سب سے زیادہ مزدور کو ریلیف ملا، عمران خان نے ہیلتھ کارڈ کی شکل میں پوری پاپولیشن کو فائدہ دیا، موجودہ حکومت صرف اپنے کیسز ختم کروانے آئی ہے، اگر سیاسی جماعتوں نے مزدور ڈے پر ایکٹیوٹی نہیں کرنی تو سیاست کس بات کی؟۔
مسرت جمشید چیمہ نے کہا کہ تحریک انصاف اپنے مزدور بھائیوں کے ساتھ کھڑی ہے، عمران خان نے کہا ہے ہم اقتدار میں آ کر احساس پروگرام کو بڑے لیول پر شروع کریں گے۔رہنما پی ٹی آئی نے مزید کہا کہ موجودہ حکومت صرف مقدمات ختم کروانے کے لیے آئی ہے، قوم آئین اور قانون کے ساتھ کھڑی ہے، قوم حقیقی آزادی کے لئے تیار ہے، باشعور اور حقیقی آزادی کے مطلب سے واقف ہوچکی ہے۔
