لاہور (رپورٹنگ آن لائن)منی لانڈرنگ کیس میں بنکنگ کورٹ لاہورنے شہباز شریف سمیت تمام ملزمان کی عبوری ضمانت میں 11دسمبر تک توسیع کردی۔
ہفتہ کو بنکنگ کورٹ لاہور میں شہبازشریف، حمزہ شہباز کی منی لانڈرنگ کیس میں عبوری ضمانت کی درخواستوں پر سماعت ہوئی۔بنکنگ جرائم کی عدالت کے جج سردار طاہر صابر نے درخواستوں پر سماعت کی۔مسلم لیگ ن کے صدرشہبازشریف، حمزہ شہباز، مسرورانور، شعیب قمر، کاشف مجید، عثمان کی حاضری مکمل کی گئی۔
جج سردار طاہرنے آئندہ سماعت پر شہباز شریف سمیت دیگر کیخلاف نامکمل چالان طلب کر لیا،آئندہ ایف آئی اے کو چالان پیش کرنے کیلئے کوئی مہلت نہیں ملے گی۔عدالت نے استفسارکیا کہ مقدمہ کے چالان سے متعلق کیا پیش رفت ہوئی؟ایف آئی اے نے عدالت کو بتایا کہ ملزم عثمان ابھی شامل تفتیش نہیں ہوا، اس لئے تفتیش مکمل نہیں ہو سکتی۔جج سردار طاہر صابر نے کہا کہ عدالت نے مکمل چالان کا نہیں بلکہ نامکمل چالان سے متعلق پوچھا ہے۔ ملزم عثمان کیوں مقدمہ میں شامل تفتیش نہیں ہوا؟ ۔
عدالت نے کہا کہ ایف آئی اے نامکمل چالان آج حتمی تاریخ دے، ورنہ تمام تفتیشی ٹیم کو شوکاز نوٹس دوں گا،پراسیکیوٹر ایف آئی اے نے عدالت سے استدعا کی کہ عدالت 2 ہفتوں کی مہلت دے دے۔عدالت نے کہا کہ ملزم فریق کو تو اچھا لگتا ہے چاہے آپ 2 ماہ کی تاریخ لے لیں، تفتیش مکمل کرنے کا وقت پورا ہوئےزمانہ بیت گیا۔جج سردار طاہر صابرنے کہا کہ ملزموں کی طرف سے ایک بھی التوا کی تاریخ نہیں مانگی گئی۔ملزمان کے وکیل نے عدالت کو بتایا کہ شریک ملزمان پہلے ہی شامل تفتیش ہو چکے ہیں۔
محمد عثمان کے وکیل نے کہا کہ ملزم محمد عثمان کو اشتہاری قرار دے دیا جبکہ ملزم جیل میں قید تھا۔تفتیشی افسر نے عدالت کو بتایا کہ کیس انکوائری کی سطح پرتھا تب شہباز شریف کے سی ایف او محمد عثمان کو اشتہاری قراردیا تھا۔شہباز شریف نے عدالت سے کہا کہ میں کل ہی اسلام آباد سے آیا ہوں، جب بھی آپ حکم کریں گے میں حاضر ہوجاﺅں گا۔انھوں نے کہا کہ رمضان شوگرمیرے والد کی تھی، میرا رمضان شوگر ملز سے کوئی تعلق نہیں۔جج نے کہا کہ یہ باتیں آپ کی پہلے ہی نوٹ کر چکے ہیں۔
شہباز شریف نے کہا کہ رمضان شوگرملز میرا کاروبار نہیں، میرے اقدامات کی وجہ سے میرے بچوں کی شوگرملز کواربوں کا نقصان ہوا،اللہ جب مجھ سے پوچھے گا کہ اس صوبے کے عوام کیلئے کیا کیا تو میں کہوں گا میں نے غریب عوام کے پیسے بچائے۔جج نے استفسار کیا کہ یہ ساری باتیں اس کیس سے متعلق ہیں؟شہبازشریف نے کہا جی بالکل! یہ ساری باتیں اس کیس سے متعلق ہیں کیونکہ مجھ پر بے نامی داررکھنے کا الزام ہے۔ امجد پرویز ایڈووکیٹ نے کہا کہ ایک سال کا عرصہ گزرگیا ہے، ابھی تک نامکمل چالان پیش نہیں کیا گیا۔
