اسلام آ باد (رپورٹنگ آن لائن) ملک کے پہاڑی علاقوں میں برف باری کا سلسلہ جاری ، دیگر علاقوں میں دھند نے بھی ڈیرے ڈال لیے، کراچی سے کشمیر تک ملک بھر میں ٹھنڈ کا راج ہے۔
تفصیلات کے مطابق آزاد کشمیر میں بارش اور برفباری کا سلسلہ جاری ہے جس سے نظام زندگی بری طرح متاثر ہے۔ بالائی علاقوں میں رابطہ سڑکیں تاحال بند اور فون کا نظام متاثر ہے۔ وادی نیلم اور وادی لیپہ کی اہم رابطہ سڑکیں، جب کہ باغ کو حویلی سے ملانے والی سڑک بھی برف باری کے باعث بند ہے۔ گلیات میں 2 روز تک جاری رہنے والا برف باری کا سلسلہ تھم گیا۔ نتھیا گلی اور ایوبیہ میں اب تک ڈیڑھ فٹ تک برف پڑچکی ہے، جب کہ مری روڈ سے برف ہٹانے کا کام جاری ہے۔
دوسری جانب ملتان اور گرد و نواح میں دھند کا راج رہا، جہاں رات اور صبح کے اوقات میں حد نگاہ 15 میٹر تک رہ گئی۔ دھند کی وجہ سے ٹریفک کی روانی بھی متاثر ہوئی۔ پنڈی بھٹیاں میں بھی شدید دھند کے باعث حد نگاہ 30 میٹر تک رہ گئی، جب کہ مختلف مقامات پر حد نگاہ صفر ہوگئی۔ موٹر وے ایم 2 کو شدید دھند کے باعث ہر قسم کے ٹریفک کیلئے بند کیا گیا۔ لاہور ملتان روڈ پر بھی حد نگاہ 20 سے 50 میٹر رہ گئی۔ پتوکی میں پھول نگر اور حبیب آباد میں شدید دھند کے باعث مسافروں اور گاڑی سواروں کو دشواری کا سامنا رہا۔
