کراچی (رپورٹنگ آن لائن)پاکستان میں آج کاروباری روز کے دوران فی تولہ سونے کی قیمت میں کمی ریکارڈ کی گئی۔
آل پاکستان جیمز اینڈ جیولرز ایسوسی ایشن کے مطابق فی تولہ سونا 700 روپے کمی سے 2 لاکھ 75 ہزار روپے کا ہوگیا۔اسی طرح 10 گرام سونا 600 روپے کمی کے بعد 2 لاکھ 35 ہزار 768 روپے کا ہوگیا، جبکہ عالمی مارکیٹ میں سونا 7 ڈالرز کمی سے 2632 فی اونس کی سطح پر آگیا ہے اس کے علاوہ چاندی کی فی تولہ قیمت 3350 روپے پر مستحکم رہی۔
سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدتے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
