اسلام آباد( رپورٹنگ آن لائن) چیف الیکشن کمشنر سکندر سلطان راجہ نے کہا ہے کہ ملک میں بلدیاتی انتخابات اپنے وقت پر کروانا الیکشن کمیشن آف پاکستان کی آئینی ذمہ داری ہے اور الیکشن کمیشن اس بات کویقینی بنائے گا کہ ملک بھر میں بلدیاتی انتخابات مقررہ وقت پر کروائے جائیں تاہم اس سلسلے میں صوبائی حکومتوں اور دیگر متعلقہ حکام کا تعاون بہت ضروری ہے، ان خیالات کا اظہار انہوں نے بلدیاتی انتخابات کے انعقاد کے حوالے سے منعقد ہونے والے الیکشن کمیشن کے اجلاس کے دوران کیا ۔
بدھ کو الیکشن کمیشن کی جانب سے جاری کردہ اعلامیے میں کہا گیا ہے کہ بلدیاتی انتخابات کے انعقاد کے حوالے سے الیکشن کمیشن آف پاکستان کا اہم اجلاس چیف الیکشن کمشنرسکندر سلطان راجہ کی زیر صدارت الیکشن کمیشن سیکرٹریٹ میں منعقد ہوا ۔ اجلاس میں صوبائی الیکشن کمشنر زپنجاب ، خیبر پختونخوا اوربلوچستان نے ویڈیو لنک کے ذریعے شرکت کی ۔چیف الیکشن کمشنر نے اجلاس کاآغاز کرتے ہوئے کہا کہ ملک میں بلدیاتی انتخابات اپنے وقت پر کروانا الیکشن کمیشن آف پاکستان کی آئینی ذمہ داری ہے اور الیکشن کمیشن اس بات کویقینی بنائے گا کہ ملک بھر میں بلدیاتی انتخابات مقررہ وقت پر کروائے جائیں تاہم اس سلسلے میں صوبائی حکومتوں اور دیگر متعلقہ حکام کا تعاون بہت ضروری ہے ۔
لوکل گورنمنٹ الیکشنز ونگ کے متعلقہ افسران نے کمیشن کو ملک بھرمیں بلدیاتی انتخابات کے حوالے سے تیاریوں پر بریفنگ دی ۔ اجلاس کو بتایاگیا کہ صوبہ پنجاب میں حلقہ بندیوں کے حوالے سے پنجاب حکومت نے ضروری دستاویزات اور نقشہ جات ابھی تک فراہم نہیں کیے جس پر کمیشن نے یہ ہدایات جاری کیں کہ اس سلسلے میں حکومت پنجاب کو لکھا جائے کہ فوراحلقہ بندی رولز اعلامیہ جاری کرے اور تمام ضروری دستاویزات اور نقشہ جات الیکشن کمیشن کو فراہم کئے جائیں ، تاکہ حلقہ بندی کا کام شروع کیا جا سکے مزیدبرآں کمیشن نے ہدایات جاری کیں کہ چونکہ مشترکہ مفادات کونسل کی جانب سے 2017 کی مردم شماری کی منظوری دی جا چکی ہے اس لئے صوبہ سندھ اور بلوچستان میں حلقہ بندی شروع کرنے کے لئے متعلقہ صوبائی حکومت کو ضروری دستاویزات اور نقشہ جات فراہم کرنے کے لئے لکھا جائے اور صوبہ خیبر پختونخواکے سات اضلاع میں ملتوی شدہ حلقہ بندی کو دوبارہ شروع کیا جائے ۔
کمیشن نے مزید ہدایات دیں کہ وفاقی دارالحکومت اسلام آباد کے بلدیاتی انتخابات کے حوالے سے وزارت داخلہ کو لکھا جائے کہ وفاقی علاقہ میں یونین کونسلز کی تعداد ایک مقررہ مدت کے اندر مہیا کی جائے بصورت دیگر الیکشن کمیشن یونین کونسل کی پرانی تعداد پر حلقہ بندی کا کام شروع کر دے گا،تاکہ حلقہ بندیوں کا کام مکمل کیا جاسکے ۔ اجلاس کو مزید بتایا گیا کہ کنٹونمنٹ بورڈز کے بلدیاتی انتخابات کے حوالے سے تمام تر تیاریاں مکمل ہیں تاہم وفاقی حکومت کی جانب سے اس سلسلے میں باقاعدہ درخواست موصول ہونا باقی ہے جس پر کمیشن نے حکم جاری کیا کہ اس سلسلے میں متعلقہ حکام سے رابطہ کر کے بتایا جائے کہ ایک مقررہ مدت کے اندر درخواست برائے انعقاد انتخابات مہیا کی جائے بصورت دیگر الیکشن کمیشن اپنے آئینی اختیار استعمال کرتے ہوئے الیکشن کے انعقاد کی تاریخ پر غور کرے گا۔بلدیاتی انتخابات کے حوالے سے الیکشن کمیشن کا اگلا اجلاس 27مئی 2021کو طلب کیا گیا ہے جس میں تمام صوبوں کے سیکرٹریز لوکل گورنمنٹ ،وزارت داخلہ،محکمہ ملٹری لینڈ اینڈ کنٹونمنٹس اور ادارہ شماریات کے متعلقہ حکام کو بھی طلب کیا جائے گا
