اسلام آباد (رپورٹںگ آن لائن)پرنٹ، الیکٹرانک اور سوشل میڈیا پرپارلیمنٹرینز کے مفت بجلی استعمال کی خبروں پر ارکان قومی اسمبلی نے اسپیکر قومی اسمبلی سردار ایاز صادق سے رابطہ کر کے شکوہ کیا ہے کہ ارکان اسمبلی پارلیمنٹ لاجز کا کرایہ ادا کرتے ہیں، بجلی اور گیس کا بل بھی دیتے ہیں۔
ذرائع کے مطابق اراکین قومی اسمبلی نے کہاکہ انتخابات میں حصہ لینے سے پہلے تمام ادائیگیوں کا این او سی جمع کرانا لازم ہے۔رہائش کا کرایہ، بجلی اور گیس کا بل ادا کرنے کے باوجود پارلیمنٹرینز پہ کیچڑ اچھالے جانے پر ارکان برہم ہوگئے ۔
ذرائع کے مطابق اراکین نے اسپیکر سے گفتگو میں کہاکہ وزارت توانائی کی اس مہم پر خاموشی مجرمانہ ہے۔ ذرائع کے مطابق وزارت توانائی کی جانب سے مفت بجلی فراہمی کی تردید نہ کرنے پر حکومتی اور اپوزیشن ارکان نے وزارت کے خلاف تحریک استحقاق جمع کروا دی۔
اراکین نے کہاکہ وزارت توانائی کو فوری فیک نیوز کی تردید کرنا چاہیے تھی۔ اسپیکر ایاز صادق نے ارکان کو یقین دہانی کرائی کہ ارکان کی عزت و توقیر پہ کوئی کمپرومائز نہیں ہو گا،ہاؤس کا کسٹوڈین ہوں، ارکان کی عزت میں اضافہ یقینی بناؤں گا۔
