لاہور (ر پورٹنگ آن لائن) نامور اداکار معمر رانا نے کہاہے کہ اگر معیار اچھا ہو تو کم بجٹ کی فلمیں بھی کامیابی سے ہمکنار ہو سکتی ہیں ،فلمیں بنیں گی تو سنیمائوں کی رونق میں اضافہ ہوگاَ فلم انڈسٹری کی سرپرستی کون کر رہا ہے آج تک اس کا معلوم نہیںہو سکا ۔ایک انٹر ویو میں معمر رانا نے کہا کہ پاکستان میں فلمیں بننا شروع ہوئی ہیں اوراس بات کی امید پیداہوئی ہے کہ آنے والے دنوں میں پاکستان کی فلم انڈسٹری ایک بار پھر اپنا کھویا ہوا مقام حاصل کرلے گی لیکن ضرورت اس بات کی ہے .
جس طرح ٹیلی ویژن انڈسٹری میں اچھا اور معیاری کام ہو رہا ہے اسی طرح فلم انڈسٹری میں بھی اچھے موضوعات لے کر صاف ستھری اور معیاری فلمیں بنائی جائیں۔معمر رانا نے کہا کہ ضروری نہیں ہے کہ ہم بڑے بجٹ کی فلمیں بنائیں کم بجٹ کی فلمیں بھی آج کے دور میں زیادہ کامیاب ثابت ہوسکتی ہیںلیکن فلم کا معیارا چھا ہونا چاہیے ۔ہمیں فلم انڈسٹری کی باگ ڈور سنبھالنے کیلئے کسی کو ذمہ داری سونپنی ہو گی تاکہ ا س کیلئے بھی پالیسی بن سکے اور اس کی مشکلات کو حکومت کے سامنے پیش کیا جا سکے ۔
