لندن(رپورٹنگ آن لائن) مشہور برطانوی اداکار ڈیریک مارٹن 92 برس کی عمر میں انتقال کر گئے۔غیر ملکی خبر رساں ایجنسی کے مطابق معروف برطانوی اداکار ڈیریک مارٹن نے 25سال قبل برطانوی ڈراما سیریز ایسٹ اینڈرز میں ٹیکسی ڈرائیور چارلی سلیٹر کا کردار ادا کر کے شہرت حاصل کی تھی۔
برطانوی اداکار کا ایسٹ اینڈرز میں کردار ایک نرم دل ٹیکسی ڈرائیور کا تھا۔ جو مداحوں کا پسندیدہ بن گیا اور 2016تک اس کی اسکرین پر موت تک کئی اہم کہانیوں کا حصہ رہا۔مارٹن نے باقاعدہ اداکاری کی تربیت حاصل نہیں کی تھی۔ اور ان کی زندگی کا آغاز مشرقی لندن کے علاقے بو میں ہوا تھا۔ اداکاری میں قدم رکھنے سے قبل انہوں نے قصاب، سڑکوں پر کام کرنے والے مزدور اور رائل ایئر فورس میں نیشنل سروس سمیت مختلف ملازمتیں کیں۔اپنے کیریئر کا آغاز انہوں نے مشہور شو ڈاکٹر ہو میں بطور اسٹنٹ مین کیا۔
تاہم 1970کی دہائی کے اوائل میں ایک چوٹ لگنے کے بعد انہوں نے باقاعدہ اداکاری کا آغاز کیا۔طویل کیریئر کے دوران ڈیریک مارٹن نے کئی کلاسک برطانوی ٹی وی شوز جیسے زیڈ کارز، دی سیونی، مائینڈر، دی بل اور لٹل برٹین میں کام کیا۔مداحوں اور ساتھی فنکاروں نے ڈیریک مارٹن کو خراج عقیدت پیش کیا۔ اور برطانوی ٹیلی وژن کے لیے ان کی دہائیوں پر محیط خدمات کو سراہا۔ مرحوم کے پسماندگان میں ان کے دو بیٹے، جوناتھن اور ڈیوڈ شامل ہیں۔
