اسلام آباد(رپورٹنگ آن لائن ) وزیر مملکت برائے اطلاعات و نشریات فرخ حبیب نے کہا ہے کہ معاشی چیلنجز کے باوجود پائیدار 5.37 فیصد ترقی کی شرح کامیابی ہے۔
سماجی رابطے کی ویب سائٹ ٹوئٹر پر وزیر مملکت فرخ حبیب نے اپنے بیان میں کہا کہ کورونا وائرس اور عالمی سطح پر دہائی کی سب سے زیادہ مہنگائی اور دیگر معاشی چیلنجز کے باوجود پائیدار 5.37 فیصد ترقی کی شرح کامیابی ہے۔ فرخ حبیب نے کہا کہ پہلی ششمائی میں آئی ٹی برآمدات میں 35.8، ایف بی آرٹیکس وصولی میں 32.4، اسٹیٹ بینک ریزرو میں 31.8، ٹیکسٹائل برآمدات میں 26، سروسز برآمدات میں 20.4 فیصد اضافہ ہوا۔
وزیرت مملکت اطلاعات نے کہا کہ ترسیلات زر میں 13.3 فیصد اضافہ ہوا ہے۔ انہوں نے ایک اور ٹوئٹ کرتے ہوے کہا کہ فصلوں کاٹن، چاول، گنا، گندم اور مکئی کی فصلوں کی پیداوار میں اضافہ ہوا ہے، کسان کے پاس اربوں روپے کی اضافی آمدن آئی، قوت خرید میں اضافہ ہوا۔
