اسلام آ باد (رپورٹنگ آن لائن ) ترجمان بلاول بھٹو زرداری سینیٹر مصطفی نواز کھوکھر نے عبدالقادر اور قاسم گیلانی پر مقدمات درج کرنے کی مذمت کرتے ہوئے کہا ہے کہ ملتان جلسہ روکنے کیلئے قائدین پر مقدمات قابل مذمت ہیں ، حکومت اس حد تک گر گئی ہے کہ سیاسی رہنماﺅں پر تالے اور زنجیر چوری کے مقدمات درج کئے جا رہے ہیں ،
سینیٹر مصطفی نواز کھوکھر نے ایک بیان میں کہا کہ جس تیزی سے حکومت اخلاقی گراوٹ کا شکار ہے جلد مخالفوں پر بھینس اور بکری چوری کے مقدمات بھی درج کئے جائیں گے،ایسے اوچھے ہتھکنڈے آمر اور سلیکٹڈ ہی استعمال کرتے ہیں منتخب حکومتیں نہیں ، حکومت تالا چوری کے مقدمات بنائے یا توپ چوری کے ، جلسے تو ہوں گے ، ووٹ ، آٹا اور چینی چور حکومت اپوزیشن کو چوری کے جھوٹے مقدمات سے ڈرا نہیں سکتی ، قوم اس حکومت کی حقیقت جان چکی ہے یہ جو چاہے کر لیں بے نقاب ہو چکے ہیں ، مہنگائی ، بیروزگاری، بھوک اور افلاس سے تنگ لوگ اپنی بھڑاس نکالنے جلسوں میں آتے ہیں ، کٹھ پتلی حکومت کے پاﺅں اکھڑ چکے ہیں اس لئے جھوٹے مقدمات کا سہارا لے رہی ہے۔
