لاہور (رپورٹنگ آن لائن) وزیر اعلی پنجاب سردار عثمان بزدار نے کہا ہے کہ مسیحی برادری نے محفوظ اوربہترین ماحول میں کرسمس کی تقریبات منائیں۔ تفصیلات کے مطابق وزیر اعلی پنجاب سردار عثمان بزدار نے یوم قائد اور کرسمس کی تقریبات کے موقع پر بہترین سکیورٹی انتظامات پر کابینہ کمیٹی برائے امن و امان،پولیس،انتظامیہ اور قانو ن نافذ کرنے والے اداروں کو شاباش دی ہے۔
وزیر اعلی پنجاب سردار عثمان بزدار نے کہا کہ قیام امن سے متعلقہ تمام ادارے بہترین کارکردگی پر مبارکباد کے مستحق ہیں۔ عثمان بزدار نے کہا کہ عوام کے جان و مال کے تحفظ کیلئے متعلقہ اداروں اور حکام نے بہترین طریقے سے فرائض سرانجام دیئے۔
عثمان بزدار نے کہا کہ اللہ تعالی کے فضل و کرم اور پنجاب حکومت کے موثر اقدامات کے باعث صوبے بھر میں یوم قائد اور کرسمس کی تقریبات پرامن ماحول میں منعقد ہوئیں۔ وزیر اعلی پنجاب کا کہنا تھا کہ یوم قائد کی تقریبات کیلئے بھی شاندار انتظامات کئے گئے،جس پر میں متعلقہ اداروں کو مبارکباد دیتا ہوں۔ عثمان بزدار نے کہا کہ کابینہ کمیٹی کے تمام اراکین نے دن رات محنت کر کے امن عامہ کے قیام کا قومی فریضہ بطریق احسن سرانجام دیا۔
عثمان بزدار نے کہا کہ صوبائی اداروں اور محکموں کے ساتھ متعلقہ ایجنسیوں کی کوآرڈینیشن بہترین رہی۔ انہوں نے مزید کہا کہ تمام محکموں اوراداروں نے جس طرح ایک ٹیم ورک کے طور پر کام کیا وہ قابل تحسین ہے۔
