کراچی (رپورٹنگ آن لائن) اپوزیشن لیڈر سندھ اسمبلی حلیم عادل شیخ نے کہا ہے کہ مراد علی شاہ سندھ کے عوام کا گنہگار ہے۔ تفصیلات کے مطابق وزیر اعلی سندھ کے خطاب پر اپوزیشن لیڈر سندھ اسمبلی حلیم عادل شیخ نے ردعمل دیتے ہوئے کہا کہ مراد علی شاہ پہلے یہ بتائیں سندھ کی ترقی کا پیسہ کہاں برباد کیا ہے۔
ان کا کہنا تھا کہ وفاقی حکومت نے 3 سالوں میں سندھ کو 1900ارب این ایف سی کی مد میں دیا ہے، سندھ میں مصنوعی مہنگائی کا بحران پیدا کرنے والا خود وزیر اعلی ہے۔ حلیم عادل شیخ کا کہنا تھا کہ نااہل وزیر اعلی سے اشیا خوردونوش کی قیمتیں اور ذخیرہ اندوزی قابو نہیں کی جاتی ہیں، برصغیر میں مراد علی شاہ جیسا چندی چور اور پینشن چور وزیر اعلی کہیں نہیں ہوگا۔ ان کا مزید کہنا تھا کہ کراچی میں کھلی کچہری کرنے کے بجائے مراد علی شاہ اپنے آبائی حلقے میں کچہری کریں، حلقے کے لوگ مراد علی شاہ کا استقبال کرنے کیلئے انڈے تیار کرکے بیٹھے ہیں۔
حلیم عادل شیخ نے کہا کہ سندھ کے بچوں کو کتوں اور ایڈز سے مارنے والے شرفا و ہمدرد بننے کا ڈھونگ بند کریں ، سندھ حکومت اپنے اقتدار کی الٹی گنتی گننا شروع کردے۔ انہوں نے یہ بھی کہا کہ قومی حمایت کے ساتھ پی ٹی آئی سندھ حکومت کا تخت جلد الٹنے والی ہے۔
