لاہور(رپورٹنگ آن لائن)چیئرمین پاکستان کرکٹ بورڈ محسن نقوی نے قومی کرکٹ ٹیم کے کھلاڑیوں سے ملاقات کی جس میں محسن نقوی نے آئی سی سی ٹی ٹوئنٹی ورلڈ کپ کے حوالے سے پی سی بی کے موقف پر کھلاڑیوں کو اعتماد میں لیا ۔
اتوار کو جاری اعلامیہ کے مطابق کھلاڑیوں نے چیئرمین پی سی بی محسن نقوی کے اصولی موقف کو سراہا اور مکمّل حمایت کی۔چیئرمین پی سی بی محسن نقوی نے پاک آسٹریلیا ٹی ٹوئنٹی سیریز کے لئے قومی کرکٹ ٹیم کے لئے نیک خواہشات کا اظہار کیا ہے ۔
محسن نقوی نے کہاکہ ورلڈکپ میں بھارت نہ کھیلنے کے حوالے سے بنگلہ دیش کرکٹ بورڈ کا موقف اصولوں پر مبنی ہے،پی سی بی آئی سی سی کے دوہرے معیار کو مسترد کرتا ہے۔ انہوںنے کہاکہ ہم نے کرکٹ کے سنہری اصولوں کو مدنظر رکھ کر بنگلہ دیش کی حمایت کی۔ محسن نقوی نے کہاکہ پاکستانی حکومت جو فیصلہ کرے گی اسے من و عن عمل کریں گے۔
انہوںنے کہاکہ سیاست زدہ کرکٹ کسی کے مفاد میں نہیں، سب کو کرکٹ کے اصولوں پر چلنا چاہیے۔ محسن نقوی نے کہاکہ ہمارے کھلاڑی با صلاحیت اور ہر لحاظ سے مقابلہ کرنا جانتے ہیں۔ انہوںنے کہاکہ کسی بھی میدان میں کامیابی ٹیم ورک سے حاصل ہوتی ہے۔ انہوںنے کہاکہ شائقین کرکٹ کی نظریں بھی پاک آسٹریلیا سیریز پر ہیں اور وہ بجا طور پر آپ سے بہترین کارکردگی کی توقع رکھتے ہیں۔
کھلاڑیوں نے کہاکہ ہم سب پی سی بی کے اصولی موقف کے ساتھ ہیں۔ اعلامیہ کے مطابق کپتان سلمان آغا ،ہیڈ کوچ مائیک ہیسن،مینجر ٹیم نوید اکرم چیمہ، عاقب جاوید،چیف آپریٹنگ آفیسر پی سی بی، ڈائریکٹر میڈیا ،ڈائریکٹر کمرشل اور دیگر حکام بھی اس موقع پر موجود تھے۔
