اسلام آباد (رپورٹنگ آن لائن) وفاقی وزیر داخلہ محسن نقوی نے علی الصبح شاہین چوک انڈر پاس کا دورہ کیا اور انڈر پاس کو 31 دسمبر تک ٹریفک کے لیے کھولنے کی ہدایت بھی دی۔
وفاقی وزیر داخلہ محسن نقوی نے سائٹ پر فنشنگ ورک کا معائنہ کیا اور دورے کے دوران انڈر پاس پر کارپٹنگ ورک کا مشاہدہ بھی کیا۔
محسن نقوی نے منصوبے کے اطراف ہارٹیکلچر اور لینڈ سکیپنگ کے کام کا جائزہ لیا، انہوں نے متعلقہ حکام کو ہدایت کی کہ منصوبے کے اطراف مزید پودے لگائے جائیں تاکہ علاقے کو خوبصورت اور ماحول دوست بنایا جا سکے۔
وفاقی وزیر نے ہدایت دیتے ہوئے کہا کہ شاہین چوک انڈر پاس کو 31 دسمبر تک ہر صورت ٹریفک کے لیے کھول دیا جائے، اس منصوبے کی تکمیل سے شاہین چوک پر ٹریفک کا دیرینہ مسئلہ مستقل طور پر حل ہو جائے گا جس سے شہریوں کو آمدورفت میں بے پناہ آسانی حاصل ہوگی اور ٹریفک جام سے نجات ملے گی۔
دورے کے موقع پر چیئرمین سی ڈی اے نے وفاقی وزیر داخلہ کو منصوبے سے متعلق تفصیلی بریفنگ دی اور کام کی رفتار اور تکمیل کے مراحل سے آگاہ کیا۔
