نئی دہلی(رپورٹنگ آن لائن)ٹی20 ورلڈکپ کے فائنل میں جنوبی افریقی بلے باز ڈیوڈ ملر کا شاندار کیچ پکڑ کر بھارت کی جیت پر مہر ثبت کرنے والے سوریاکمار یادوو نے ڈیوڈ ملر کے کیچ پر رد عمل دیتے ہوئے کہا ہے کہ مجھے یقین تھا کہ باؤنڈری لائن پر کیچ پکڑتے ہوئے رسی کو نہیں چھوا تھا۔کھیلوں کی ویب سائٹ کرک انفو کی رپورٹ کے مطابق بھارت کے جارح مزاج بلے باز سوریا کمار یادوو نے ٹی20 ورلڈکپ 2024 کے فائنل کے آخری اوور میں ڈیوڈ ملر کے کیچ پر رد عمل دیتے ہوئے کہا کہ جیسے ہی انہوں نے دیکھا گیند باؤنڈری کی جانب آرہی ہے اور روہت شرما کا وہاں تک پہنچنا ناممکن تھا کیونکہ وہ تھوڑے فاصلے پر تھے جس پر انہوں نے ہرحال میں یہ کیچ تھامنے کا فیصلہ کیا۔
بھارتی ٹی وی انڈین ایکسپریس کو انٹریو دیتے ہوئے سوریا کمار یادوو نے کہا کہ عام طور پر روہت شرما لانگ آن پر فیلڈنگ نہیں کرتے لیکن اس لمحے وہ وہاں موجود تھے اور جیسے ہی گیند ہماری طرف آئی تو چند لمحات کے لیے ہم نے ایک دوسرے کی جانب دیکھا، جس کے بعد میں نے گیند کی طرف دوڑ لگائی۔
انہوں نے کہا کہ اگر روہت شرما تھوڑا قریب ہوتے تو میں یہ کیچ لینے کی کوشش نہیں کرتاچونکہ وہ میرے مقابلے میں تھوڑے فاصلے پر تھے اس لیے میں نے اس کیچ کو لینے کا فیصلہ کیا اور اس 4 سے 5 سیکنڈ میں جو بھی ہوا، میں اس کی وضاحت الفاظ میں نہیں کرسکتا۔یاد رہے کہ جنوبی افریقہ کو ٹی20 ورلڈکپ چیمپئن بننے کے لیے آخری اوور میں 15 رنز درکار تھے، ایسے میں ہاردک پانڈیا کی پہلی ہی گیند پر ڈیوڈ ملر نے زور دار ہٹ لگائی، لیکن سوریا کمار یادوو نے اپنی مہارت سے اس چھکے کو کیچ میں تبدیل کرکے پروٹیز کی امیدوں پر پانی پھیر دیا تاہم گزشتہ کئی روز سے سوشل میڈیا پر اس کیچ سے متعلق بحث جاری ہے کہ آیا یہ کیچ کلیئر تھا یا نہیں، کیوں کہ گردش کردہ ویڈیو میں سوریا کمار کے کیچ پکڑتے وقت دو باتیں سامنے آئیں، پہلی تو یہ کہ باؤنڈری لائن کی رسی اپنے مقام سے پیچھے تھی، اور بظاہر ایسا دکھائی دے رہا ہے کہ کیچ تھامتے ہوئے سوریا کمار کا پاؤں رسی کو چھوا تھا اس حوالے سے جنوبی افریقہ کے سابق کپتان شان پولاک کے بیان نے اس کیچ سے متعلق مزید سوالات پیدا کردیے، انہوں نے کہاکہ باؤنڈری کا کشن ہلا ضرور تھا لیکن یہ کھیل کے دوران ہوا تھا اور اس سے سوریا کمار کا کوئی لینا دینا نہیں تھا اور انہوں نے انتہائی مہارت سے وہ کیچ پکڑا تھا۔
