لاہور( رپورٹنگ آن لائن)مسلم لیگ(ن) پنجاب کی سیکرٹری اطلاعات عظمی بخاری نے کہا ہے کہ فردوس باجی مجھے دھمکیاں دیتے دیتے خود فرار ہوگئی ہیں،فردوس باجی آپ ایک فون کال کی مار نکلیں، مجھے ذاتی طور پر فردوس باجی سے دلی ہمدردی ہے ،افسوس کی بات ہے ہر بار زبردستی استعفے لے کر خوشی خوشی فوری منظور کر لیا جاتا ہے ۔
اپنے بیان میں انہوں نے کہا کہ عمران خان کے حکم پر پنجاب میں وزراء اور بیوروکریٹس کو لگانا اور ہٹانا صوبائی معاملات میں کھلی مداخلت ہے ،عمران خان تین سال بعد بھی اپنے وسیم اکرم پلس کو با اختیار نہیں بناسکے ،گیارہ کروڑ کا صوبہ ایک انڈرٹریننگ شخص کے حوالے کرنا عمران خان کی دانستہ غلطی تھی ،شہبازشریف کا مقابلہ کرنے والے عثمان بزدار ایک چپڑاسی تبدیل کرنے کا بھی اختیار نہیں رکھتے ،جب قوم پر چابی والے کھلونے اور ریموٹ کنٹرول پر چلنے والے لوگ مسلط ہوں گے تو ترقی کا تصور بھی ناممکن ہے ۔
انہوں نے کہا کہ چابی والے کھلونے کی تین سال سے سیاسی دکان نوازشر یف اور شہبازشریف کے سہارے ہی چل رہی ہے ،عمران خان کے کھاتے سے نوازشریف کا نام نکال دیں تو ان کی ٹوٹل کارکردگی زبانی جمع خرچ تک محدود ہے۔
