اسلام آباد (رپورٹنگ آن لائن)گورنر پنجاب سردار سلیم حیدر نے کہا ہے کہ ماضی میں نوجوانوں کو گمراہ کیا گیا جس سے ان کا مستقبل بری طرح متاثر ہوا، پیپلز پارٹی ہمیشہ نوجوانوں کے لیے قومی سیاست میں مثبت کردار ادا کرنے کے لیے حقیقی پلیٹ فارم کے طور پر کھڑی رہی ہے۔
پاکستان تحریک انصاف کے کئی سرکردہ رہنمائوں کے ہمراہ نیشنل پریس کلب اسلام آباد میں پاکستان پیپلز پارٹی میں شمولیت کا اعلان کرنے کے موقع پر سلیم حیدر نے نوجوان سیاسی کارکنوں کا خیرمقدم کیا جو انہوں نے”شہیدوں کی پارٹی”میں شمولیت اختیار کی اور انہیں یقین دلایا کہ انہیں مایوسی کا سامنا نہیں کرنا پڑے گا۔انہوں نے کہا کہ ماضی میں کشمیر میں مشکل حالات کے باوجود کسی نے پیپلز پارٹی کو نہیں چھوڑا جو پارٹی کی مضبوط نظریاتی بنیادوں کی عکاسی کرتا ہے،سلیم حیدر نے فیصل راٹھور کو کشمیر میں ایک نوجوان اور ابھرتے ہوئے رہنما کے طور پر اجاگر کیا اور اس اعتماد کا اظہار کیا کہ مستقبل میں پیپلز پارٹی ایک بار پھر حکومت بنائے گی۔
انہوں نے کہا کہ کشمیر کے لیے پیپلز پارٹی کی خدمات اور کارنامے سنہرے الفاظ میں لکھے جانے کے مستحق ہیں۔گورنر پنجاب نے کہا کہ پیپلز پارٹی کے چیئرمین بلاول بھٹو زرداری شہداء کے حقیقی وارث ہیں اور نہ صرف پارٹی کے قائد بلکہ قوم کی ضرورت ہیں، انہوں نے کہا کہ اگرچہ پیپلز پارٹی کو ماضی میں سیاسی اور انتخابی نقصانات کا سامنا کرنا پڑا لیکن اس نے ملک کو کبھی نقصان نہیں پہنچنے دیا اور ہمیشہ قومی مفاد کو پارٹی پر مقدم رکھا۔سردار سلیم حیدر نے کہا کہ پیپلز پارٹی استحکام کے مفاد میں موجودہ سیاسی نظام کی مکمل حمایت کر رہی ہے،بلاول بھٹو زرداری کے حالیہ دورہ پنجاب کا حوالہ دیتے ہوئے کہا کہ دورے کے دوران کئی ایم این ایز اور ایم پی اے پی پی پی میں شامل ہوئے،پیپلز پارٹی میں باضابطہ شمولیت اختیار کرنے والوں میں چوہدری زاہد فرید، وائس چیئرمین ڈسٹرکٹ جہلم ویلی۔ چوہدری محمد شکیل سابق سپیکر یوتھ اسمبلی۔
چوہدری ساجد رفیق، چوہدری عابد حسین، اور چوہدری ساجد اپنے ساتھیوں اور معاونین کی ایک بڑی تعداد کے ساتھ شامل تھے، یہ اعلان گورنر پنجاب سردار سلیم حیدر اور آزاد جموں و کشمیر کے صدر چوہدری یاسین کی موجودگی میں کیا گیا،اس موقع پر خطاب کرتے ہوئے نئے شامل ہونے والے رہنمائوں نے بلاول بھٹو کی قیادت پر مکمل اعتماد کا اظہار کرتے ہوئے ان کے عوام پر مبنی وژن اور نوجوانوں کو بااختیار بنانے کی پالیسیوں کو سراہا۔
انہوںنے کہاکہ ان کی قیادت میں پیپلز پارٹی واحد سیاسی جماعت ہے جو ملک کو درپیش سیاسی، معاشی اور عوامی چیلنجز کو بخوبی سمجھتی ہے اور عملی حل پیش کرنے کی بے صلاحیت رکھتی ہے، اس موقع پر پی پی پی آزاد جموں و کشمیر کے صدر چوہدری یاسین نے کہا کہ پاکستان پیپلز پارٹی کی تاریخ صاف اور شفاف ہے، انہوں نے مزید کہا کہ پیپلز پارٹی میں شامل ہونے والوں کا سیاسی مستقبل روشن اور محفوظ ہے۔
