اسلام آباد (رپورٹنگ آن لائن) وزیراعظم عمران خان نے 30سال بعد ٹیکسٹائل انڈسٹری مکمل بحال ہونے پر کہا کہ ماشااللہ ہمارا ملک کورونا وبا کے باوجودصحیح سمت پرگامزن ہے۔
جمعرات کو سماجی رابطے کی ویب سائٹ ٹوئٹر پر اپنے بیان میں 30سال بعد ٹیکسٹائل انڈسٹری مکمل بحال ہونے پر وزیر اعظم عمران خان نے ردعمل کا اظہار کرتے ہوئے کہا ماشااللہ ہمارا ملک کورونا وبا کے باوجودصحیح سمت پرگامزن ہے۔
دوسری جانب معاون خصوصی ڈاکٹرشہباز گل نے سماجی رابطے کی ویب سائٹ ٹوئٹر پر اپنے بیان میں کہا کہ سب سے بڑی صنعت کو30سال میں تباہی کے دھانے پرکھڑاکردیاگیا، کپتان نے صنعت ٹھیک کرنے کابیڑااٹھایااور2سال قبل اصلاحاتی پیکج دیا، جس کے نتیجے میں ٹیکسٹائل کی صنعت100فیصداستعداد پر فعال ہے۔
ڈاکٹرشہباز گل کا کہنا تھا کہ بہت سے یونٹ اپنی استعداد بڑھانے کے لیے توسیع کر رہے ہیں، ٹیکسٹائل سیکٹر کو 2 لاکھ مزدوروں کی کمی کے سامنے کااندازہ ہے، کپتان کی سربراہی میں قوم چوروں لٹیروں کو انجام کی طرف جاتا دیکھ رہی ہے، پاکستان عالمی دنیا میں کھویا ہوا مقام اور عظمت رفتہ بھی پھرحاصل کرے گا۔
پی ٹی آئی رہنماعندلیب عباس نے اپنے پیغام میں کہا کہ 30سال بعد پہلی بار ٹیکسٹائل انڈسٹری مکمل طور پر بحال ہوگئی، ملک میں 50ہزار بند پاور لومز چل پڑیں ہیں ،حکومتی اقدامات سے ٹیکسٹائل سیکٹرکودنیابھرسے آرڈرمل رہے ہیں، حکومت نے صنعتوں کو3سال تک25فیصدکم ریٹ پربجلی دینے کااعلان کیاہے۔
