لاہور (رپورٹنگ آن لائن) لاہور الیکٹرک سپلائی کمپنی (لیسکو) نے صارفین کے لیے اے ایم آئی سنگل فیز سمارٹ میٹرز کی بڑے پیمانے پر خریداری کا فیصلہ کر لیا ۔
ذرائع کے مطابق لیسکو نے 2لاکھ 40ہزار اے ایم آئی سنگل فیز سمارٹ میٹرز کی خریداری کی منظوری دے دی ہے، جس پر 3ارب 50کروڑ روپے تک لاگت آنے کا تخمینہ ہے۔لیسکو کے شعبہ میٹریل مینجمنٹ نے اے ایم آئی سنگل فیز سمارٹ میٹرز کی خریداری کا عمل باقاعدہ طور پر شروع کر دیا ہے۔ یہ میٹرز صارفین کو دیئے جانے والے نئے بجلی کنکشنز کے لیے استعمال کیے جائیں گے۔
اس وقت لیسکو میں صارفین کو این او سی کی بنیاد پر کنکشن فراہم کیے جا رہے ہیں، جس کے تحت صارفین خود مارکیٹ سے سمارٹ میٹر خریدتے ہیں۔ لیسکو کی جانب سے صارفین کو اے ایم آئی سنگل فیز سمارٹ میٹر کی خریداری کے لیے این او سی جاری کی جاتی ہے۔ذرائع کے مطابق جیسے ہی لیسکو کے پاس سمارٹ میٹرز کا اسٹاک دستیاب ہوگا، صارفین کو ڈیمانڈ نوٹس جاری کیے جائیں گے اور اس کے بعد این او سی کے اجراء پر پابندی عائد کر دی جائے گی۔
