کراچی(رپورٹنگ آن لائن)پاکستانی شوبز انڈسٹری کی معروف اداکارہ بشریٰ انصاری نے کہاہے کہ لوگ اب کامیڈی کے بجائے فحاشی پر ہنستے ہیں۔
بشریٰ انصاری نے سندھ مدرستہ الاسلام یونیورسٹی کی پاپولر لیکچر سیریز میں انٹرٹینمنٹ انڈسٹری میں کامیڈی کے گرتے ہوئے معیار کے بارے میں بات کرتے ہوئے کہاکہ لوگ اب فحاشی پر ہنسنے لگے ہیں، کانٹینٹ کری ایٹرز اور انفلوئنسرز بھی آج کل سوچتے ہیں کہ گستاخانہ رویہ کامیڈی ہے لیکن ایسا نہیں ہے۔اداکارہ نے کہا کہ ہم لوگوں کو سادہ اور صاف مزاح سے ہنسایا کرتے تھے اور ہم اب بھی یہی کرتے ہیں،اگر آج ہمارے کانٹینٹ کری ایٹرز اس قسم کے مواد سے کامیاب ہیں تو یہ ہماری ناکامی ہے۔
انہوں نے پاکستانی ڈرامہ انڈسٹری کی کہانیوں کو دہرانے کے رجحان پر بات کرتے ہوئے کہاکہ پروڈکشن ہاؤسز ڈراموں کو ایک سرمایہ کاری کے طور پر دیکھتے ہیں، وہ ڈراموں سے منافع کمانا چاہتے ہیں اس لیے وہ صرف وہی بناتے ہیں جسے زیادہ تر لوگ دیکھنا پسند کرتے ہیں۔
انہوں نے انکشاف کیا کہ میں نے 60سال کی عمر میں اپنے شوہر اقبال حسین سے دوسری شادی کی، مجھے اس بات پر خوشی ہے کہ میں نے ان میں ایک اچھے ساتھی کو پایا اور ہم ایک دوسرے کا بہت احترام کرتے ہیں۔
