نیویارک(رپورٹنگ آن لائن)اقوام متحدہ میں پاکستانی مستقل مندوب عاصم افتخار نے کہا ہے کہ قانون کی حکمرانی امن، انصاف اور اجتماعی سلامتی کیلئے ناگزیر ہے تاہم آج بین الاقوامی قانون کے احترام کو کڑی آزمائش کا سامنا ہے۔
سلامتی کونسل کے مباحثے سے خطاب کرتے ہوئے انہوںنے کہاکہ یکطرفہ اقدامات نے ریاستوں کے عالمی قوانین پر اعتماد کو شدید مجروح کیا ہے۔عاصم افتخارنے کہاکہ اگر قانون طاقت یا وقتی مصلحت کے آگے جھک جائے تو نہ صرف عدم استحکام گہرا ہوگا بلکہ تنازعات مزید شدت اختیار کریں گے اور پْرامن بقائے باہمی خطرے میں پڑ جائے گی۔پاکستانی مندوب نے خبردار کیا کہ یکطرفہ اقدامات کو معمول بنانے کی کوششیں اجتماعی سلامتی کو کمزور کر رہی ہیں اور پاکستان خود بھی ایسی خلاف ورزیوں کا سامنا کر چکا ہے۔
انہوں نے کہا کہ بھارت نے گزشتہ سال پاکستانی خودمختاری کی خلاف ورزی کرتے ہوئے جارحیت کا ارتکاب کیا۔پاکستانی مستقل مندوب نے بتایاکہ پاکستان نے اس صورتحال میں حق دفاع کو ذمہ دارانہ، محتاط اور متناسب انداز میں استعمال کیا، اور پاکستانی ردعمل نے واضح پیغام دیا کہ جبر کسی صورت قابلِ قبول نہیں۔انہوں نے زور دیاکہ ریاستوں کے مابین تعلقات کا واحد معیار بین الاقوامی قانون کا احترام ہونا چاہیے، کیونکہ اسی میں عالمی امن اور استحکام کی ضمانت پوشیدہ ہے۔
