لاہور(رپورٹنگ آن لائن)پاکستان کے ٹیسٹ کرکٹر عمر اکمل نے کہا ہے کہ جنھوں نے اسپاٹ فکسنگ کی وہ کرکٹرز پاکستان ٹیم میں واپس آگئے اور کھیل رہے ہیں۔
قومی ٹیم سے کافی عرصے سے دور عمر اکمل نے کہا ہے کہ ایسے کرکٹرز جنھوں نے اسپاٹ فکسنگ کی یا پاکستان کیخلاف کچھ کیا ان پر کچھ ماہ کی پابندی لگی، تاہم ایسے کرکٹرز ٹیم میں واپس آگئے اور کھیل رہے ہیں، مجھے اپنا کیس جیتنے کے باوجود کرکٹ سے دور کردیا گیا۔نجی ٹی وی کے پروگرام میں گفتگو کرتے ہوئے عمر اکمل نے کہا کہ گوگل پر ایسے کرکٹرز کی لسٹ موجود ہے اور ان کے نام بھی ہیں لیکن میرا نام نہیں ہے۔
قومی کرکٹرعمر اکمل نے کہا کہ میرے بیٹے کو کرکٹ کھیلنے کا بہت شوق ہے لیکن میں یہ نہیں چاہتا کہ وہ پاکستان کے لیے کرکٹ کھیلے کیونکہ پی سی بی کھلاڑیوں کی عزت نہیں کرتا۔انھوں نے دعویٰ کیا کہ پاکستان کرکٹ بورڈ نے مجھ پر ناجائز الزامات لگا کر میرے کیرئیر کے 7 سال ضائع کیے، میرے ساتھ اس طرح کا سلوک کیا گیا ہے تو میں نہیں چاہوں گا کہ میرے بیٹے کے ساتھ بھی ایسا ہو۔
عمر اکمل نے کہا کہ چاہتا ہوں کہ میرا بیٹا پاکستان کے بجائے کسی بھی ایسے ملک کے لیے کرکٹ کھیلے جہاں کرکٹ اور کرکٹرز کی عزت کی جاتی ہو۔انھوں نے بتایا کہ ڈومیسٹک میں اچھی پرفارمنس کے باوجود مجھے دوبارہ کھیلنے کا موقع نہیں دیا گیا، میں اپنے خلاف دائر کیے گئے مقدمے جیت گیا تھا، پی سی بی میں بیٹھے لوگوں سے برداشت نہیں ہوا کہ کل کا بچہ آیا اور ہم سے کیس جیت کر چلا گیا۔
