فلم انڈسٹری سے جڑا ہوا ہر شخص اس کی بحالی اور عروج کیلئے دعا گو رہتا ہے ‘ جاوید شیخ

لاہور(رپورٹنگ آن لائن) سینئر اداکار جاوید شیخ نے کہا ہے کہ فلم انڈسٹری سے جڑا ہوا ہر شخص اس کی بحالی اور عروج کیلئے دعا گو رہتا ہے ، ایک فلم کے پراجیکٹ سے سینکڑوں لوگوں کوروزگار کے مواقع میسر آتے ہیں اس کی بحالی نا گزیر ہے ، اب وقت آ گیا ہے کہ فلم انڈسٹری کو دوبارہ عروج دینے کیلئے ایک پلیٹ فارم سے متفقہ اور جامع پالیسی مرتب کی جائے ۔

ایک انٹر ویو میں جاوید شیخ نے کہا کہ پاکستان کی فلم انڈسٹری میں بڑا پوٹینشل ہے جس سے استفادہ کرنے کیلئے سب کو اپنا کردار ادا کرناہوگا۔فلموں کیلئے سب سے بڑا مسئلہ سرمایہ کاری ہے جس کیلئے میری تجویز ہے کسی ایک سرمایہ کار کی بجائے مشترکہ سرمایہ کار ی ہونی چاہیے ۔

انہوں نے کہا کہ میں آج بھی خدا کی ذات سے یہی دعا کرتا ہوں کہ پاکستان کی فلم انڈسٹری دوبارہ عروج حاصل کرے ۔ فلم انڈسٹری کے لئے جہاں میری ضرورت ہو گی میں تعاون کرنے کے لئے تیار ہوں ۔