لاہور(رپورٹنگ آن لائن ) اسپیکر پنجاب اسمبلی چوہدری پرویز الہی نے کہا ہے کہ فرقہ واریت نے پاکستان کو بہت نقصان پہنچایا ہے، توہین رسالت پر کوئی سمجھوتہ نہیں ہو گا۔
سپیکر پنجاب اسمبلی چودھری پرویزالہی سے ن لیگی رکن پنجاب اسمبلی جلیل احمد شرقپوری کی قیادت میں علما کرام کے وفد نے ان کی رہائش گاہ پر ملاقات کی۔ وفد میں ریاض سلطان الحسن شاہ، مفتی سید عاشق حسین اور پیر اختر رسول قادری شامل تھے۔ تمام علما کرام نے سابق وزیراعظم چودھری شجاعت حسین کی خیریت دریافت کی اور ان کی جلد اور مکمل صحت یابی کیلئے خصوصی دعا بھی کروائی۔
اس موقع پر چوہدری پرویزالہی کا کہنا تھا کہ مسلمانوں کو اب یک آواز ہو کر تمام فورمز پر آواز بلند کرنا ہو گی۔ دنیا اب سمجھ جائے کہ اپنے نبی آخر الزماں محمد رسول اللہ ﷺ کی شان کی خاطر ہم سب ایک ہیں۔ جلیل شرقپوری کا کہنا تھا کہ تحفظ اسلام بل روکا نہیں جانا چاہئے، علما کے اندر تشویش پائی جاتی ہے۔ دستار اور سنت رسول ﷺ کی بے حرمتی کرنے والوں اور میرے ساتھ ہونے والے واقعہ کے مرتکب ارکان اسمبلی کے خلاف کارروائی کی جائے، تحفظ اسلام بل پر اللہ تعالی آپ کو جزائے خیر عطا فرمائے۔
انشا اللہ تاریخ میں آپ کا نام اس حوالے سے ہمیشہ یاد رکھا جائے گا۔ جلیل شرقپوری نے کہا کہ چودھری پرویزالہی وہ پہلے سیاسی رہنما ہیں جنہوں نے پنجاب اسمبلی سے قانون پاس کروا کر خاتم النبیین محمد رسول اللہﷺ، امہات المومنین اور دیگر صحابہ کرام رضوان اللہ علیہم اجمعین کے بارے میں نازیبا مواد پر مشتمل کتب پر فوری پابندی لگائی اور ایسے گستاخانہ مواد کو مارکیٹ سے ضبط بھی کروایا۔
