لاہور (ر پورٹنگ آن لائن)قومی کرکٹ ٹیم کے کھلاڑی فخر زمان کو کووڈـ19 سمیت دیگر ٹیسٹ کلیئر آنے پر گھر جانے کی اجازت دے دی گئی۔بائیں ہاتھ کے اوپننگ بیٹسمین فخر زمان قومی کرکٹ اسکواڈ کے نیوزی لینڈ روانگی سے چند گھنٹے قبل بخار میں مبتلا ہوگئے تھے جس کے بعد وہ دورہ نیوزی لینڈ سے باہر ہو گئے تھے اور انہیں آئسولیشن میں بھیج دیا گیا تھا۔ پاکستان کرکٹ بورڈ (پی سی بی) کے مطابق فخر زمان کا کووڈـ19 ٹیسٹ منفی آیا ہے جبکہ بخار سے متعلقہ کرائے دیگر ٹیسٹ بھی کلیئر آئے ہیں، تمام ٹیسٹ کلیئر آنے کے بعد فخر زمان کو گھر جانے کی اجازت دے دی گئی ہے۔ پی سی بی کے مطابق فخر زمان کی طبعیت اب بہتر ہے، فخر زمان کی روانگی سے قبل جس طرح کی طبیعت تھی وہ ٹریول گائیڈ لائنز کے مطابق سفر کرنے کے اہل نہیں تھے۔ خیال رہے کہ فخر زمان کے کووڈـ19 سمیت دیگر ٹیسٹ گزشتہ روز ہوئے تھے، پاکستان کرکٹ اسکواڈ پیر کی صبح لاہور سے براستہ دبئی نیوزی لینڈ روانہ ہوا تھا اور طویل مسافت کے بعد کرائسٹ چرچ پہنچ چکا ہے۔
