لاہور (رپورٹنگ آن لائن)امیر جماعت اسلامی پنجاب وسطی محمد جاوید قصوری نے کہا ہے کہ فافن کی تازہ رپورٹ جس میں انکشاف کیا گیا ہے کہ ”پاکستان کے انتخابی نتائج گزشتہ دو دہائیوں سے بہتری کی جانب گامزن نہیں ہوئے ، قومی و صوبائی اسمبلیاں ایک چوتھائی سے بھی کم رجسٹرڈ ووٹرز ہیں جبکہ نصف ڈالے گئے ہیں” جو کہ اس بات کی عکاسی کرتا ہے کہ قوم کا موجودہ انتخابی نظام پرسے اعتماد اٹھ چکا ہے ۔
اس کو بحال کرنے کے لئے فرسودہ نظام سے نجات حاصل کرنی ہو گی اور شفافیت کو یقینی بنانا ہو گا جس پر تمام سیاسی جماعتیں اور عوام متفق ہوں۔ ان خیالات کا اظہار انہوں نے گزشتہ روز مختلف تقریبات سے خطاب کرتے ہوئے کیا ۔انہوں نے کہا کہ آج ہمارے ملک کا نظام جن لوگوں کے ہاتھوں میں ہے وہ اللہ کے باغی بندے ہیں ۔ ہمیں یہ اقتدار اور اختیار ان سے حاصل کرکے اللہ کے نیک بندوں کو دینا ہے ۔
پاکستان کو اغیار کی غلامی میں دینے والے حکمران خود کو قوم کے سامنے جوابدہ نہیں سمجھتے۔ ان کی وجہ سے آج پاکستان کی معیشت برباد ہو چکی ہے ۔حکمرانوں کی عیاشیاں ختم ہونے کا نام نہیں لے رہی ۔ جماعت اسلامی دین حق کے غلبے کے لئے جدوجہد کر رہی ہے ۔اسلام کے نام پر وجود میں آنے والے ملک کے اندر صرف اور صرف اللہ کا دین ہی کامیاب ہو سکتا ہے ۔
محمد جاوید قصوری نے اس حوالے سے مزید کہا کہ ملک غربت اور جہالت میں ڈوبا ہوا ہے لیکن ہماری سول اور غیر سول افسرشاہی اپنے ٹھاٹھ باٹھ چھوڑنے تیار نہیں ہے ۔ملٹی نیشنل کمپنیاںخون نچوڑ رہی ہیں۔ جو حکومت آتی ہے وہ پروٹوکول اور اپنی مراعات کے حصول میں کمی تو کرتی نہیں بلکہ الٹا ملک کو مزید قرضوں کے بوجھ تلے دبا دیتی ہے۔ معیشت زبوں حالی کا شکار اور عوام کی مشکلات میں دن بدن اضافہ ہوتا چلا جا رہا ہے ۔ پی ڈی ایم ٹو کی حکومت اندازوں سے بھی زیادہ خراب کارکردگی کا مظاہرہ کر رہی ہے ۔
