لاہور ( رپورٹنگ آن لائن ) مسلم لیگ (ن) کے مرکزی رہنما و سابق وزیر اعلیٰ پنجاب حمزہ شہباز نے کہا ہے کہ فارن فنڈنگ ثابت ہونے کے بعد عمران نیازی آج خائن بھی ڈکلیئر ہو گیا ہے۔
انہوں نے الیکشن کمیشن کے فیصلے پر ردعمل کا اظہار کرتے ہوئے کہا کہ تحریک انصاف کے سربراہ توشہ خانہ کی امانتوں پر ہاتھ صاف کرتے ہوئے رنگے ہاتھوں پکڑے گئے، ثبوتوں سے واضح ہو گیا کہ عمران نیازی کرپٹ بھی ہے۔وزیراعظم کے عہدے پر بیٹھ کر سرکاری مال خانے کے تحفے بیچ ڈالے گئے۔ ملکی اداروں کی ساکھ پر انگلی اٹھانے والوں کو شرم آنی چاہئے۔
حمزہ شہباز نے کہا کہ توشہ خانے کے تحائف کی اصل مالیت بھی عمران نیازی سے وصول ہونی چاہئے۔ عمران نیازی کے اس غیر قانونی اور غیر اخلاقی اقدام سے پاکستان کے دوست ممالک سے تعلقات کو گزند پہنچی۔ آج کے فیصلے سے ملک میں قانون اور انصاف کا بول بالا ہوا ہے۔
