اسلام آباد(رپورٹنگ آن لائن)سربراہ پاکستان عوامی مسلم لیگ اور سابق وزیر داخلہ شیخ رشید احمد نے کہا ہے کہ آنیوالے الیکشن میں لوگ حکمرانوں سے مہنگائی کا انتقام لیں گے اور عمران خان کو ووٹ ڈالیں گے، جمعہ کو سپریم کورٹ کے باہر میڈیا سے گفتگو کرتے ہوئے سابق وزیر داخلہ شیخ رشیدنے کہا کہ اوور سیز پاکستانیوں کو ووٹ سے متعلق کیس کی سماعت کے دوران الیکشن کمیشن سے پوچھا گیا کیا کارکردگی دکھائی، الیکشن کمیشن نے ابھی تک پائلٹ پراجیکٹ بھی شروع نہیں کیا،
انہوں نے کہا کہ جو انتخابات سے متعلق سپریم کورٹ فیصلے کی حکم عدولی کرے گا وہ کٹہرے میں کھڑا ہوگا، الیکشن ہو کر رہیں گے ، کوئی طاقت ان الیکشن کو نہیں روک سکتی،سابق وزیر داخلہ نے کہا کہ پنجاب اور خیبرپختونخوا میں الیکشن ہونے جا رہے ہیں، مہنگائی کے طوفان کا انتقام عوام ووٹ سے لیں گے اور عمران خان کی حمایت کریں گے،اس موقع پر رہنما تحریک انصاف اور سینیٹر شبلی فراز نے کہا کہ اوورسیز ووٹرز اس بات پر سخت ناراض ہیں کہ ووٹ کا حق ان سے کیوں چھینا گیا ہے، پی ٹی آئی کی جنگ یہی ہے ہم لوگوں کو حقوق دلوائیں، ہم چاہتے ہیں اوورسیز کو ووٹ کا حق دیا جائے۔
