کراچی (رپورٹنگ آن لائن)پی ٹی آئی سندھ کے صدر حلیم عادل شیخ نے اپنے جاری کردہ وڈیو بیان میں کہا ہے کہ ملک زور زبردستی کے فیصلوں سے نہیں چلتا عوامی رائے کو اہمیت نہ دینے سے عوام کی دلوں میں نفرتیں بڑھ رہی ہیں۔ خان سے دشمنی میں کرپٹ حکمرانوں نے ملک کو ہی دائو پر لگا دیا ایک طرف مہنگائی کا طوفان ہے تو دوسری طرف ملک کی معیشت ڈوب رہی ہے۔
عمران خان کے نظریہ سے خوفزدہ حکمران کس طرح ملک چلائیں گے۔حلیم عادل شیخ نے کہا دو ہفتوں سے بانی چیئرمین عمران خان سے کسی کی بھی ملاقات نہیں کرائی گئی، عمران خان سے فیملی کی ملاقات کرانے پر ڈی چوک احتجاج مئوخر کرایا گیا تھا لیکن حکومت نے ایک بار پھر دوکھا دیا۔ آئین پاکستان میں ترامیم کے لئے ہمارے اراکین کو حراساں کیا جارہا ہے، کبھی کے دن تو کبھی کی راتیں بڑی ہوتی ہیں، عوامی اور انصاف کی حکمرانی بھی آنی ہے سب سے حساب ہوگا۔
حلیم عادل شیخ نے کہا ملک میں جاری فسطائیت کے خلاف 18 اکتوبر ملکگیر احتجاج ہوگا، سندھ کے تمام شہروں میں بھرپور احتجاج کیا جائے گا، کل 18 اکتوبر جمعہ کے دن ملکگیر مظاہروں کا اعلان کیا گیا ہے پوری قوم اور ہم سب عمران خان کی سلامتی کے حوالے سے پریشان ہیں اور اسی دوران حکمران آئینی ترامیم کرنا چاہ رہے ہیں، یہ لوگ آئین کو توڑنا اور عدلیہ کا کمزور کرنا چاہ رہے ہیں جس کے لئے ہمارے لوگوں کو حراسان کیا جارہا ہے، بہنوں، بیٹیوں کو اغوا کیا جارہا ہے۔حلیم عادل شیخ نے کہا ملکگیراحتجاج کے اعلان پر سندھ بھر میں احتجاج کیا جائے گا ہم عمران خان کی رہائی، آئین کی بالادستی، چوری شدہ مینڈیٹ کی واپسی کے لے احتجاج کریں، بڑھتی ہوئی مہنگائی نے عوام کو جینا محال کر دیا ہے عوام پریشان ہے کراچی سے لیکر کشمور تک حیدرآباد سے گھوٹکی تک ہر ضلعے میں مظاہرے ہونگے پر امن احتجاج کرنا ہمارا آئینی حق ہے ہم پر کیک کاٹنے پر بھی دہشتگردی کے پرچے کاٹے جاتے ہیں، انشا اللہ کل سندھ بھرمیں پر امن بھرپوراحتجاج کریں گے۔
٭٭٭٭٭
