اسلام آباد (رپورٹنگ آن لائن) پاکستان مسلم لیگ(ن) پنجاب کی ترجمان عظمیٰ بخاری نے کہا ہے کہ عمران خان کے کھوکھلے نعروں نے پاکستان کی جڑوں کو بھی کھوکھلا کردیا ہے۔
ہفتے کو مسلم لیگ(ن) پنجاب کی ترجمان عظمیٰ بخاری نے ترجمان پنجاب حکومت کے بیان پر ردعمل دیتے ہوئے کہا کہ عمران خان خود کوبند گلی میں لے گئے ہیں جہاں سے واپسی صرف تابوت میں ممکن ہے،بزدار کے نئے پرچی ترجمان نوکری پکی کرنے کےلئے اچھل کود کررہے ہیں، فیاض چوہان آپکے نیچے سے دوبارہ کرسی کھینچنے کے لیے تگ و دو کررہا ہے۔ پرچی ترجمان اپنی کرسی بچائیں پی ڈی ایم کو ختم کرنے والے خود اپنے جال میں پھنس گئے ہیں، پی ڈی ایم کی فاتحہ پڑھنے والے خود تابوت میں بند ہونے جارہے ہیں اور انکی کوئی فاتحہ بھی نہیں پڑھے گا۔
انہوں نے کہا کہ نوازشریف اور شہبازشریف ٹھگ انسٹیٹیوٹ آف پاکستان کے لیے خوف کی علامت بن چکے ہیں، ٹھگوں کا ٹولہ غریب کی منہ سے نوالہ چھین کر بھی شرمندگی محسوس نہیں کررہا۔،شرم و حیااس ٹولے کے قریب سے بھی نہیں گزری، پی ڈی ایم کے ہر جلسے پر عمران خان چمچوں اور منشیوں مڑور اٹھنا شروع ہوجاتے ہیں۔
